गुंलाया लसताय् २५ गू गुंला बाजं खलःया मिसात जक दुथ्याकाः गुंला बाजं व्वज्या याइगु जूगु दु।
येँ महानगरपालिका १८ वडाया ग्वसालय् व ङत तुलाधर गुंला बाजं उपसमितिया व्यवस्थापनय् वइगु गुंलागा अष्टमी (साउन ३१ गते) शनिवाः ‘न्हापांगु मिसा गुंला बाजं ब्वज्या-११४५’ ग्वसाः ग्वयेत्यंगु खः ।
येँ महानगरपालिका १८ वडापाखें वंगु बिहीवाः छगू प्रेस साक्षात्कार ज्याझ्वः यासें न्हापांखुसी मिसा गुंला बाजं ब्वज्याया बारे जानकारी बिउगु खः। येँ महानगरपालिका १८ वडाअध्यक्ष न्हुछेकाजी महर्जनं मिसापिं जक दुथ्याकाः गुंला बाजं ब्वज्या यायेगु ताःई न्ह्यःनिसें कुतः जुयाच्वंगु जानकारी बियादिल। गुंला बाजं छगू नेवाःतय् महत्वपूर्ण सम्पदा जक मखसे थ्व धार्मिक, सांस्कृतिक ल्याखं नं उतिकं महत्वं जाःगु खँ कनादिसें नेवाः ल्याय्म्ह पुस्तायात कला, संस्कृति पुस्तान्तरण यायेगु ल्याखं थुकथंया ज्याझ्वः यायेत्यनागु धयादिल ।
मिसातय्गु जक गुंला बाजं ब्वज्या यायेगु ताःई न्ह्यःनिसें कुतः जुयाच्वंगु खँय् विशेष बः वियादिसें वडाअध्यक्ष महर्जनं थुगुसी थुगु कुतलं सार्थकता कायेत्यंगु खँ कनादिल। अमूर्त सम्पदा ल्यंका तयेगु, उकियात न्ह्यःने यंकेगु व पुस्तान्तरण याना यंकेगु ज्याय् मिसातय्गु तःधंगु ल्हाः दइ धासें नेवाः मिसातय्त नं हरेक ख्यलय् न्ह्यःने यंकेगु उद्देश्यं थुकथंया ब्वज्या यायेत्यनागु वय्कलं कनादिल ।
परम्परागत व मौलिक नेवाः बाजं जक थायेगु व थाकेगु मखसे न्हू पुस्तायात नेवाः भाय् नं ल्हायेगु ल्हाकेगु लकस व्वलंकेमाःगु खँय् बः बियादिसें वय्कलं भाषा, कला, संस्कृति, सम्पदा संरक्षण, संबर्द्धन यायेगु ज्याय् झी सकलें छप्पँ जुयाः न्ह्याः वनेमाः धयादिल ।
ङत तुलाधार समिति अन्तर्गतया गुंलाबाजं उपसमितिया नायः पुर्णरत्न तुलाधरं थनिं नीन्यादँ न्ह्यः हे मिसातय्सं गुंला बाजं थायेगु शुरु याना हःगु जानकारी बियादिसें थौंया अवस्थाय् तक थ्यंगु इलय् गुंला बाजंया ख्यलय् आपालं हिउपाः वःगु व थुकिया लिउने मिसातय्गु सहभागिताया कारणं खः धयादिल ।
ज्याझ्वलय् प्रेस विज्ञप्ती ब्वनाः न्यंकादिसें वय्कलं येँ महानगर दुनेया २५ गू गुंला बाजं खलःपाखें मिसापिं जक दुथ्याकाः गुंला बाजंया ब्वज्या जुइगु जानकारी नं बियादीगु खः ।
प्रेस साक्षात्कार ज्याझ्वलय् गोलाप्रथा यानाः बाजं खलःयात प्रस्तुति न्ह्यब्वयेगु पाः नं क्वःछिउगु खः ।