विक्रम संवत् २०८३या न्हूदँनिसें येँय् वाइफाइ सेवालिसेंया चान्हसिया बस सेवा न्ह्याकूग दु । थ्व सेवां येँ महानगरपालिका, यल महानगरपालिका, चन्द्रागिरी नगरपालिका व बुढानीलकण्ठ नगरपालिकाया भौगोलिक क्षेत्र स्वाईगु बस सेवा पुल्चोकं न्ह्याकूगु खः । येँ महानगरपालिकाया कार्यवाहक प्रमुख सुनिता डंगोल, यल महानगरपालिकाया प्रमुख चिरीबाबु महर्जन, चन्द्रागिरि नगरपालिकाया प्रमुख घनश्याम गिरी व वुढानीलकण्ठ नगरपालिकाया प्रमुख मिठाराम अधिकारीं समन्वय व सहकार्य सम्बन्धी समझदारी पतिइ ल्हाःचिं तयाः सेवा न्ह्याकूगु खः ।
आयात ७ गः बसं सेवा बीगु न्ह्याकूगु दु । थथे न्ह्याकूगु बसया न्ह्यःनेया ब्वय् छगः , चालक च्वनिगु ब्वय् छगः व यात्रु च्वनीगु ब्व खनेदयेक निगः यानाः प्यंगः सीसीटिभी क्यामरां बसया निगरानी याइगु जूगु दु । सिसिटीभीया लू निगरानी नियन्त्रण कक्षं स्वयेफइगु जूगुलिं बस दुने छुं नं कथंया मखुगु ब्यवहार याःपिन्त तत्काल नियन्त्रणय् कायेफइगु धाःगु दु । यात्रीतय् सुरक्षाया निंतिं येँ महानगरपालिकां हरेक बसय् १ म्ह नगर प्रहरी पोशाकय् खटय् याःगु दु ।
सेवा न्ह्याकुसें येँ महानगरपालिकाया कार्यवाहक प्रमुख डंगोलं, चान्हसिया सेवायात ताःई न्ह्याकेगु व न्हिनसिया सेवायात भिंकेगु तातुनम दुगु खँ तयादिल । वय्कलं न्हापाया अभ्यासं वःगु लिच्वःया खँ न्ह्यथसें म्हिगःया अभ्यास लगानीया आर्थिक प्रतिफलय् केन्द्रीत जूगु तर थौं थःपिसं आर्थिक प्रतिफल मखुसे चुस्त व गुणस्तरीय सेवा बीगु तातुनागु धाःगु दु । स्वनिगःया स्थानीय तगिंया दथुइ समन्वय यानाः लागत सहभागिताया मोडल दयेकेगुनं वय्कलं तयादिल ।
सेवा न्ह्याःगु खँय् स्वनिगःया स्थानीय तगिंया दथुइ छगू हे मत दुगु न्ह्यथसें यल महानगरपालिकाया प्रमुख महर्जनं धयादिल, आर्थिक साझेदारिताय् सकसिया साझा मत हे सेवा ताःई न्ह्याईगु महत्वपूर्ण आधार खः । थ्व सेवां यक्व नागरिक लाभान्वित जुइगुलिं थः तसकं उत्साहित जुयागु वय्कलं धयादिल ।
चन्द्रागिरि नगरपालिकाया प्रमुख गिरीं, थानकोट नाकां न्हिथं ५० द्वः मनूत येँय् वये वने याइगु खँ तयादिसें चन्द्रागिरिया पर्यटकीय थासय् यें वयेवने अःपुइवं थुकिं आर्थिक व सामाजिक ज्याखँय् स्वतः योगदान याइ धयादिल ।
बुढानीलकण्ठ नगरया प्रमुख अधिकारीं चा बस सेवाया खँय् स्थानीयपिंके थम्हं कयागु प्रतिक्रिया बारे कँसें धयादिल, स्थानीयबासी तसकं लय्ताः । थुकिया विकास व विस्तार यायां यंकेमाः ।
नगरपालिकातसें साझा यातायातलिसे सहकार्य यानाः थ्व सेवा न्हयाकूगु खः । वइगु असार मसान्ततक सेवाया लागत साझा यातायातं ब्यहोरय् याइ । थ्व इलय् जूगु खर्चया विश्लेषण यानाः पालिकातसें लागत सहभागिता ब्यहोरय् यायेगु प्रतिवद्धता याःगु दु । साझा यातायातया अध्यक्ष शुशिलराज प्याकुरेलं थ्व थःपिनि नीति महत्वपूर्ण जूगु धयादिल ।
चान्हसिया बस सेवा न्ह्याकेत याःगु पूर्व अभ्यासय् वुढानीलकण्ठं बहनी ८ बजे पिहाँ वःगु बस १६ मिनेटय् महाराजगञ्ज चोक थ्यंगु खः । लगनखेल थ्यंबलय् ८ः४६ ताः जूगु खः । सवारी चापया हुनिं थ्व बस जमः लागाय् छुं ई दीमाःगु खः । थानकोटं ८ ताः इलय् पिहां वःगु बस २१ मिनेटय् कलंकी चोक व ४५ मिनेटय् एअरपोर्ट थ्यंगु खः ।
बस सेवा हरेक रुटया सुरु व अन्तिम विन्दुतक न्ह्याइ । अर्थात् दक्षिण रुटय् न्ह्याइगु छगः बस ललितपुरया लगनखेलं न्ह्यानाः पाटन अस्पताल, अल्का, नर्भिक, प्रसुति गृह, ट्रमा सेन्टर, वीर अस्पताल, कान्ति अस्पताल, टिचिङ् अस्पताल, गंगालाल हृदय केन्द्र जुयाः बुढानीलकण्ठतक बनी । मेगु बस बुढानीलकण्ठं गंगालाल अस्पताल, महाराजगञ्ज चोक, पानीपोखरी, लाजिम्पाट, जमल, थापाथली, पुल्चोक जुयाः लगनखेलतक न्हयाई । नयाँ सडक गेट अर्थात् एनएसी न्ह्यःनें छगः बस न्ह्याइ । थुकथं स्वथासं बस न्ह्याःगु हरेक बस दिके थासय् २० मिनेटया अन्तरय् बस थ्यनी । थ्व सडकया एकतर्फी दुरी १६ किलोमिटर खः ।
पूर्वपश्चिम रुटया दुरी २० किलोमिटर दु । थ्व रुटय् छगः बस थानकोटं सतुंगल, कलंकी, कालीमाटी, त्रिपुरेश्वर, सुन्धारा, नयाँ सडक, जमल, भद्रकाली, माइतीघर मण्डला, बानेश्वर, मीनभवन, तीनकुने जुयाः अन्तरराष्ट्रिय विमान स्थलया निंतिं न्ह्याइ । मेगु बस विमानस्थलं, तीनकुने, मीनभवन, नयाँ बानेश्वर, बबरमहल, थापाथली, त्रिपुरेश्वर, कालीमाटी, सोल्टीमोड, रविभवन, कलंकी जसयाः थानकोटपाखे न्ह्याइ । नयाँ सडक गेट न्ह्यःने अर्थात् एनएसीं छगः बस थानकोटपाखे व मेगु बस विमानस्थलपाखे बनी । थ्व प्यंगू थासय् बस न्हयाःगु हरेक बस दिके थासय् हरेक २० मिनेटय् बस उपलब्ध जुइ ।