नेपाः देयया हे छगू तसकं महत्व जाःगु ऐतिहासिक जात्राया रुपय् न्ह्याना च्वंगु येँयाया महत्वयात उजागर यायगु तातुना शाक्य महाविहार संघपाखेंं पिथंगु येँयाः ९इन्द्रजात्रा ० सफूया उलेज्या होटेल हेरिटेज प्याफलय् आइतवाः जूगु दु ।
प्रा आनन्द रत्न शाक्यजुं च्वयादीगु उगु सफू मूपाहाँ प्रतिनिधि सभाया सांसद कुलभक्त शाक्य , येँ देय्या मूलचक्रेश्वर फणीन्द्र रत्न बज्राचार्य, प्रा।डा। नरेशमान बज्राचार्य, , शाक्य महाविहार संघया नायः शुभकाजी शाक्य व दी शाक्य फाउण्डेशन नेपालया नायः माधुरी शाक्यपिन्सं मंकाः रुपं उलेज्या यानादीगु खः ।
संघया न्वकु अमिरमान शाक्यं लसकुस न्वचु तयादीगु उगु ज्याझ्वलय् सफू च्वमि प्रा। आनन्द रत्न शाक्यं उलेज्या जूगु सफूया बारे जानकारी बियादिसें कुमारी रथ यात्राया ऐतिहासिक खँत न कनादिल । ज्याझ्वःया मूपाहां सभासद कुलभक्त शाक्यं त्वादेवाय् मत च्याका ज्याझ्वःया उलेज्या यानादीगु खःसा वयकःयात शाक्य महाविहार संघंःप्रतिनिधि सभाया सभासद जुयादीगुया लसताय् ख्येँ संग बिया दोसल्ला न्ययका हनावना तयाः हनेज्या नंं याःगु खः । थुगु हनापौ संघया महासचिव संघरत्न शाक्यजुं ब्वना न्यंकादीगु खः ।
थुगु हे झ्वलय् मूलचके्रश्वर फणीन्द्र रत्न बज्राचार्यजुयात ध्रुव तारा सम्मान देछायगु ज्या नं जूगु खःसा भाजु बज्राचार्यजुयात मूपाहां कुलभक्त शाक्यं हनापौ देछानादीगु खः । संघया नायः शुभकाजी शाक्यजुं दोसल्लां न्ययकादीगु खः ।
उगु ज्याझ्वलय् प्रा।डा।नरेशमान बज्राचार्य व मूपाहां सांसद कुलभक्त शाक्यपिन्सं थःथःगु नुगः खँ तया बिज्यागु खः । प्रा।डा नरेशमान बज्राचार्यजुं थःगु खँया झ्वलय् झीगु सामाजिक, धार्मिक ज्याखँत याना च्वनेमाःगु भुइख्यः थौं कन्हय् थीथी पक्ष थःगु पक्षय् लानाच्वंगु व थन थीथीकथंया भौतिक संरचना दयका हयाच्वंगु पक्षया खँया जानकारी बियाविज्यासें उकिइ झीगु हे अधिनय् लानाच्वंने माःगु खँयात विशेष बः बिया ज्याखँत न्ह्याकाच्वनागु खँ कनादीगु खः ।
थुकथ हे मूपाहां भाजु कुलभक्त शाक्यं थौं कन्हय् नेवाः नं प्रतिनिधि सभाय् मदयाच्वंगु खँ उलादिसें नेवाः सरोकारया खँत संसदय् थम्हं क्वातुक तया वनेगु व नेवाः सरोकारया पक्षयात गुकथं फु उकथं ज्या याना वनेगु खँ कनादीगु खः ।
संघया न्वकुृ गौतम रत्न शाक्यजुं न्ह्याकादीगु उगु ज्याझ्वःया अन्तय् सभापतिया थासं थःगु नुगः खँ तयादिसें सकसितं सुभाय् देछानादीगु खः । थुगु सफू बागमती प्रदेश सामाजिक विकास विभागया पाठशाला कार्यक्रम अन्तरगतया आर्थिक ग्वहालिं पिथनेगु ज्यान जूग खः ।