नेवाः पत्रकार राष्ट्रिय दबू येँ जिल्लाया न्हू ज्यासना पुचःयात ज्यापु महागुथि नेपाःपाखें थाैं छगू ज्याझ्वःया ग्वसाःग्वसें भिंतुना देछाःगु दु ।
महागुथिया नायः सत्यनारायण डंगाेलया नायःसुइ जूगु ज्याझ्वः मूछ्याञ्जे बेखानारायण महर्जनं न्ह्याकूगु खः ।
ज्याझ्वलय् नुगःखँ तयादिसें नायः डंगाेलं येँ जिल्लाया ज्यासना पुचलय् महागुथिया सञ्चार कवःया कजि रत्न काजी महर्जन सर्वसम्मत नायः जुयादीगुलिं लसता प्वंकुसें महागुथि व पत्रकार दबू दथुइ क्वातुगु स्वापु दया वनीगु भलसा प्वंकादिल । वय्कलं ज्यापु महागुथि नेपाःया सञ्चार कवःया कजि व दबूया नायः छम्ह हे जूगुलिं नं ज्या अःपुक जुइगु भलसा दुगु खँ तयादिल ।
ज्याझ्वलय् दबूया येँ जिल्ला नायः महर्जनं महागुथि व दबूया दथुइ सहकार्य न्ह्याका वनेगु व तत्काल दबूया ज्याकू मदुगुलिं महागुथि भवनय् अस्थायी ज्याकूया निंतिं थाय् बियादीत इनाप याःगु खः ।
थुकिया विषयस महागुथिया सचिवालयय् सहलह यायेगु व मुँज्या च्वनेगु निंतिं महागुथिया सञ्चार कवःलिसे समन्वय यानाः थाय् छ्यलेफइगु बचं बियादीगु दु ।
ज्याझ्वलय् महागुथिया न्हापांम्ह न्वकु मचाराजा महर्जनं लसकुस यानादीगु खःसा महागुथिया निम्हम्ह न्वकू सरिता महर्जन, ल्यूदांभरिं कुलबहादुर महर्जन, ल्यूछ्याञ्जे सानुबाबु महर्जन, दुजःपिं हेराशाेभा महर्जन व शान्ता प्रजापति, सञ्चार कवःया दुजः रवि महर्जनं ब्वति कयादीगु खःसा पत्रकार दबूपाखें न्वकू विरेन्द्र शाक्य, ल्यूछ्याञ्जेपिं सुविन्द्र श्रेष्ठ व तुलसी केशरी प्रजापति, दांभरिं प्रशान्त डंगाेल, दुजःपिं रविन्द्र बज्राचार्य, सागरराज लवत, सलिना शाक्य, अस्मिता श्रेष्ठ, ताेखा नगर समितिया कजि सानुराजा डंगाेलया ब्वति दुगु खः ।