सरकारं रसुवाया भोटेकोशी खुसिइ वःगु खुसिबालं मदुपिनिगु सम्मानय् भदौ २२ गते राष्ट्रिय शोक माने यायेगु निर्णय याःगु दु ।
प्रधानमन्त्री नापं मन्त्रिपरिषद्या ज्याकुथि सिंहदरबारय् थौं च्वंगु मन्त्रिपरिषद्या बैठकं खुसिबालं मदुपिनिगु सम्मानय् राष्ट्रिय शोक माने यायेगु निर्णय याःगु सरकारया प्रवक्ता लिसें शिक्षा नापं खेलकुदमन्त्री सस्मित पोखरेलं जानकारी बियादिल । राष्ट्रिय शोकया दिं नेपाःन्यंकंया सरकारी ज्याकुथि नापं विदेशय् च्वंगु नेपाली दूतावास व नियोगय् राष्ट्रिय ध्वाँय् बच्छि आधा झुके याइ ।
अथेहे, सरकारं भदौ २३ गते ‘जेन्जी’ सहिद दिवसया झ्वलय् देय्न्यंकं सार्वजनिक बिदा बिइगु निर्णय याःगु मन्त्री पोखरेलं जानकारी बियादिल ।
सरकारं भोटेकोशी खुसिबालं प्रभावित नागरिकतय्गु उद्धार नापं राहतया निंतिं एसियाली विकास बैङ्क (एडिबी) पाखें वइगु ५ ‘मिलियन’ अमेरिकी डलर अनुदान स्वीकार याःगु खः ।
बैठकं खुसिबालं प्रभावित मनू, उद्योग, व्यापार–व्यवसाययात थत्थें सञ्चालन यायेत एकीकृत व्यावसायिक पुनरुत्थान योजनाअन्तर्गत राहत, कर नापं महसुल छुटलिसेंया सहुलियत व सुविधा उपलब्ध याकेगु निर्णय याःगु खः ।
सरकारं साल्ट ट्रेडिङ कर्पोरेसन लिमिटेड व खाद्य व्यवस्था नापं व्यापार कम्पनी लिमिटेडयात १ प्रतिशत भन्सार महसुलय् २५ द्वः मेट्रिक टन चिनी आयात यायेत स्वीकृति ब्यूगु खः । उद्धार यायेत वनाच्वंपिं कर्मचारीतय्त विशेष सुविधा सरकारं भोटेकोशी खुसिबाःलिपा मालेज्याय् नापं उद्धारय् वनाच्वंपिं सुरक्षाकःमि नापं राष्ट्रसेवक कर्मचारीतय्त जोखिम भत्ता व खाजा खर्च उपलब्ध याकेगु निर्णय याःगु खः ।
थथेहे उद्धारया झ्वलय् घाःपाः जूसा निःशुल्क उपचार नापं छुं जुयाः सित धाःसा मदुपिनि छेँजःपिंत प्रतिमृतक १० गू लख राहत उपलब्ध याकीगु जूगु खः ।
मन्त्रिपरिषद् बैठकं नेपाल प्रशासन सेवाअन्तर्गत राजपत्राङ्कित विशिष्ट श्रेणीया सचिव पदय् नारायणप्रसाद भट्टयात बढुवा यानाः मुख्यमन्त्री व मन्त्रिपरिषद्या ज्याकुथि, कोशी प्रदेशया प्रमुख सचिवय् पदस्थापन यायेगु निर्णय याःगु प्रवक्ता लिसें मन्त्री पोखरेलं जानकारी बियादिल ।