परराष्ट्रसचिव अमृतबहादुर राईं नेपाल ‘छगू चीन सिद्धान्तप्रति’ दृढ दुगु व नेपाःया भूमियात चीनया हितविरुद्ध छ्ययेके मबीगु प्रतिबद्धता हाकनं प्वंकादीगु दु ।
वय्कलं नेपाल व चीनदथुइया कूटनीतिक सम्बन्ध पञ्चशीलया सिद्धान्त, बांलाःम्ह जःलाखःला, थवंथः साझेदारी, सहकार्य, समानता व छम्हंमेम्हेसिगु भावना व संवेदनशीलताप्रतिया सम्मानय् लिधनाच्वंगु धयादिल ।
नेपाल व चीनदथुइया कूटनीतिक सम्बन्धया ७१ क्वःगु वार्षिकोत्सव समारोह लिसें २०२६ नेपाल–चीनमैत्री लघु भिडियो धेंधेंबल्लाया पुरस्कार वितरण समारोहया झ्वलय् बिहीबाः थन ग्वसाःग्वःगु ज्याझ्वलय् न्वंवानादिसें परराष्ट्रसचिव राईं थ्व वार्षिकोत्सव ‘झीगु कूटनीतिक पात्रोया छगू सिलसिलाजक मखु चिरस्थायी सम्बन्धया दसि खः’ धयादिल ।
न्हय्गू दशकय् निगूपक्षीय स्वापू, परम्परागत स्वापू व सांस्कृतिक कालबिलपाखें मंकाः समृद्धि हयेत बृहत् साझेदारीतक विस्तार जूगु परराष्ट्रसचिव राईं न्ह्यथनादिल ।
वय्कःया कथं उच्चस्तरीय भ्रमणलिसें थी थी तगिंया कालबिलं नेपाल–चीन सम्बन्धया फुक्क पक्षय् गतिशीलता व जीवन्तता वयेकाः मित्रता अप्वयेकूगु खः । निगूपक्षीय स्वापूया लिसें नेपाल व चीनं नियमय् लिधनाच्वंगु विश्वव्यापी व्यवस्थाया निंतिं बहुपक्षीयताप्रति दृढ प्रतिबद्धता प्वंकूगु व मंकाः हितया विषयय् थी थी बहुपक्षीय मञ्चय् सहकार्य यानावयाच्वंगु वय्कलं कनादिल ।
छम्ह भिंम्ह पासा व लिक्क लाःम्ह जःलाखःलाकथं चीनं हासिल याःगु अजूचाइपुगु आर्थिक विकासप्रति नेपालं गौरव याःगु व उकिं सयेकेत नापं भिनावनाच्वंगु चिनियाँ अर्थतन्त्रलिसे नेपाःया आर्थिक सहकार्य नं अप्वयेकेमास्तिवयेकूगु वय्कलं ध्वाथुइकादिल ।
वंगु न्हय्गू दशकय् नेपाल व चीनदथुइ व्यापार, लगानी, पूर्वाधार विकास, पर्यटन, शिक्षा, संस्कृति व जनस्तरया सम्बन्धय् व्यापक विस्तार जूगु दु धासें सचिव राईं ट्रान्स–हिमालयन बहुआयामिक सम्पर्क सञ्जाल व थुकिया याकनं कार्यान्वयन यायेगुलिं नेपालं महत्व बिइगु धयादिल ।
उगु झ्वलय् चिनियाँ राजदूत चाङ माओमिङं निगू देय्दथुइ कूटनीतिक स्वापू पलिस्था जुसांनिसें आःतक अन्तरराष्ट्रिय परिदृश्य न्ह्याक्व हे हिलावंसां नं छम्हंमेम्हेसित सम्मान, विश्वास व समर्थन यानावयाच्वंगु व सुखदुःखय् नापनापं दनीम्ह भिंम्ह जःलाखःला, भिंम्ह पासा व भिंम्ह साझेदार जूगु धारणा तयादिल ।
नेपालय् न्हूगु सरकार गठन जुसांनिसें नेपाल–चीनदथुइया राजनीतिक थवंथः विश्वास अप्वयावंगु व उच्चस्तरीय ‘बेल्ट एन्ड रोड सहकार्य’ ठोस लिच्वःलिसें न्ह्यानाच्वंगु चिनियाँ राजदूतया धापू खः ।
व्यापार नापं अर्थतन्त्र, पूर्वाधार, सम्पर्क–सञ्जाल, ऊर्जा, कृषि, शिक्षा, स्वास्थ्य व पर्यटनलिसेंया ख्यलय् न्हूगु प्रगति हासिल जूगु धासें राजदूत माओमिङं तःधंगु ल्याखय् चिनियाँ पर्यटक नेपाःया अनुपम सुन्दरता स्वयेत वयाच्वंगु धयादिल । निगुलिं देय्या जनतादथुइया थुगु सामान्य तर लुमुगु कालबिल हे थौंया नेपाल–चीन सम्बन्धया वास्तविक जग जूगु राजदूत माओमिङया धापू खः ।
सन् २०१९ य् चिनियाँ राष्ट्रपति सी चिनफिङं यानादीगु नेपाःया राजकीय भ्रमणं निगू देय्दथुइया सम्बन्धयात ‘विकास व समृद्धिया निंतिं दीर्घकालीन रणनीतिक साझेदारी’या स्तरय् थ्यंकूगु राजदूत माओमिङं लुमंकादिल ।
राजदूत माओमिङं चीनं न्ह्याबलें शान्तिपूर्ण विकासया लँपु नालावयाच्वंगु लिसें फुक्क देय् इमिगु आकार, शक्ति वा न्ह्याथे हे आर्थिक अवस्था जूसां नं छम्हंमेम्हसित सम्मान, समान व्यवहार यायेमाः व शान्तिपूर्वक सहअस्तित्वय् च्वनाच्वनेमाः धइगु मान्यता तयावयाच्वंगु बिचाः प्वंकादिल ।
वय्कलं चीन नेपाललिसे थवंथः सम्मान व थवंथः लाभय् आधारित जुयाः निगू देय्दथुइया सम्बन्धयात अझ न्ह्याकायंकेत, निगुलिं देशदथुइ जूगु महत्त्वपूर्ण समझदारी कार्यान्वयन यायेत व नेपाल–चीनदथुइ मंकाः भविष्यया समुदाय निर्माणयात न्ह्याकायंकेत तयार दूगु जानकारी बियादिल ।
राजदूत माओमिङं डिजिटल युगय् चीहाकःगु श्रव्यदृश्य सामग्रीं भाषा, दूरी व संस्कृतिया सीमास्वयां च्वय् दनाः विषयवस्तुयात छुं सेकेन्डय् हे व्यापक दर्शकतक थ्यंकेफु धासें लसता प्वंकादिल ।
थुगुसीया नेपाल–चीनमैत्री लघु भिडियो धेंधेंबल्लाय् तःधंगु ल्याखय् भिडियोत वःगु व प्रतिस्पर्धीतय्सं नेपाल–चीन सम्बन्धया थी थी आयाम व निगू देय्या बांबांलाःगु दृश्य दुथ्याकातःगुलिं च्वछानादिल ।
श्रव्यदृश्य सामग्रीइ भावना व आत्मियता स्वानाच्वंगु धासें वय्कलं नेपाल–चीन सम्बन्ध केवल कूटनीतिक कागजातय् च्वयातःगु राजनीतिक सहमतिजक मखु निगू देय्या जनतादथुइया व्यापक सहकार्य, कालबिल व भ्रमणय् नं जीवित दूगु धयादिल ।
ज्याझ्वलय् नेपाल–चीनमैत्री लघु भिडियो धेंधेंबल्लाय् त्याःपिं प्रतिस्पर्धीतय्त पुरस्कार वितरण नापं सम्मान याःगु खः । धेंधेंबल्लाय् दिपेश स्याङ्दानं न्हाप लाकाः पुरस्कारकथं ५० द्वः दां त्याकादिल । उगु झ्वलय् थी थी राजनीतिक दलया नेता, कूटनीतिज्ञ, व्यवसायी लिसें मेमेगु ख्यःया व्यक्तिपिनिगु उपस्थिति दूगु खः ।
