स्वनिगःया ४३ गू ब्वनेकुथिं प्यक्वःगु न्यू जेनिथ कपय् ब्वति कायेत्यंगु दु । न्यू जेनिथ इंग्लिस मोडेल स्कूलं ग्वसाः ग्वइगु कासाय् थीथी उमेर समूहया फुटसल व बास्केटबल कासा जुइगु ग्वसाःखलकं जानकारी ब्यूगु दु ।
कासा बारे जानकारी बीत शुक्रवाः (भाद्र २६) ब्वनेकुथिइ ग्वसाः ग्वःगु पत्रकार सम्मेलनय् खेलकुद संयोजक लिसें प्रशिक्षक रोशन थापा मगरं कासा लिग कम नकआउट प्रणालीइ न्ह्याइगु कनादिल।
वय्कःया कथं फुटसलय् ११ दं क्वय्, १३ दं क्वय्, १६ दं क्वय् मिजं व १६ दं क्वय् मिसा यानाः प्यंगू विधाय् दइ । अथे हे मिसा व मिजं दथुइ बास्केटबल कासाया ग्वसाः ग्वइगु जूगु दु ।
प्यक्वःगु न्यू जेनिथ कपया उलेज्या भाद्र २९ गते सोमवाः सुथय् ८ ता इलय् विद्यालय परिसरय् जुइगु जूगु दु । उलेज्या ज्याझ्वलय् विद्यालय संचालक समितिया दुजःपिं, प्रधानाध्यापक, संयोजक, प्राज्ञिक प्रमुख व प्रशासन प्रमुख उपस्थित जुइगु ग्वसाःखलकं जानकारी ब्यूगु दु ।
असोज ४ गते जुइगु समापन ज्याझ्वलय् मूपाहाँ कथं नेपाल मिसा बास्केटबल प्रशिक्षक विकास शाही, नेपाल मिसा फुटसल प्रशिक्षक विक्रम महर्जन व काठमाडौं महानगर–१८ वडाध्यक्ष न्हुछेकाजी महर्जनं ब्वति काइगु जूगु खँ दु ।
धेंधेंबल्लाःया उत्कृष्ट स्वंगू पुचःयात पदक, ट्रफी व दसिपौ लःल्हाइगु जूगु दु । कासा न्ह्याकेगु निंतिं थ्यंमथ्यं स्वंगू निसें ४ लख ५० हजार तका खर्च जुइगु अनुमान ग्वसाःखलकं याःगु दु ।
कासा निष्पक्ष व व्यवस्थित ढंगं न्ह्याकेत फुटसलया निंतिं फिफा मान्यता प्राप्त रेफ्री व बास्केटबलया निंतिं फिबा मान्यता प्राप्त रेफ्रीयात निर्णायक कथं परिचालन यायेगु विद्यालयया संस्थापक प्रिन्सिपल राजु महर्जनं जानकारी बियादीगु दु ।
न्यू जेनिथ इंग्लिस मोडेल स्कूलं न्हापा बास्केटबल कासा जक ग्वसाः ग्वया वयाच्वंगु खः । स्वक्वःगु संस्करणनिसें फुटसलयात नं धेंधेंबल्लाखय् दुथ्याकूगु दु । ग्वसाःखलकं थुगु कासा ब्वनेकुथिया फुटसल मैदान व बास्केटबल कोर्टय् जुइगु जानकारी ब्यूगु दु ।
स्कूलय् फुटसल व बास्केटबलया नापनापं नियमित रुपं तेक्वान्दो प्रशिक्षण नं जुयाच्वंगु दु । स्कुलय् चेस व टेबुलटेनिस लिसेंया कासा गतिविधिया सुविधा दुगु प्रेस मिटय् जानकारी नं ब्यूगु खः ।