भुटानया राजधानी थिम्पुइ नकतिनि जूगु १६ क्वःगु दक्षिण एसियाली बडिबिल्डिङ कासाय् स्वर्ण त्याकूम्ह बडिबिल्डर सगेन्द्र सिंहयात छगू ज्याझ्वःया दथुइ हंगु दु।
वय्कःयात येँ महानगरपालिका १२ वडापाखें दोसल्ला व हनापाै लःल्हानाः हंगु खः ।
येँ महानगर पालिका १२ वडाया नायः बालकृष्ण महर्जनया सभापतित्वय् जूगु ज्याझ्वलय् वडा सचिव संजुमा महर्जनं लसकुस यानादीगु खः ।
ज्याझ्वलय् ज्यापु सांस्कृतिक विकास कोषया नायः मंगलकृष्ण सिंहं मखं ज्यापु गुथिया दुजः गजेन्द्रमान सिंहया काय् सगेन्द्र सिंहं स्वर्ण पदक त्याकूगुलिं लसता प्वंकादिसें थ्व स्वर्ण पदकं ज्यापुत हरेक ज्याया ख्यलय् न्ह्यःने लाःगु व कासा ख्यलय् नं न्ह्यःने लाःगु पुष्टि जूगु खँ कनादिल ।
अथे हे ज्यापु महागुथि नेपाः येँ महानगर समितिया नायः पञ्चनारायण महर्जनं थ्वसिबें न्ह्यः बडिबिल्डिङय् स्वर्ण त्याकूम्ह महेश्वर महर्जनयात लुमंकाः ज्यापु समुदायया बडिबिल्डिङय् जूगु उपलब्धि उल्लेखनीय जूगु धयादिल । लिसें वय्कलं याकनं हे महागुथिपाखें सिंहयात हनेगु योजना दुगु खँ नं कनादिल ।
वडा सदस्य पुष्परत्न प्रजापतिं ज्याझ्वःया औचित्य ध्वाथुइकादीगु खः, अले मेम्ह वडा सदस्य श्यामकृष्ण खड्गीं हनापाै ब्वनाः न्यंकादीगु खः ।
ज्याझ्वलय् सम्मानित व्यक्तित्व सिंहं फिजिकल फिटनेस कासाया निंतिं डाइटय् विशेष ध्यान बीमाःगु व कासा न्ह्यः स्वन्हुतक लः तकं त्वनेमज्यूगु धयादिल । वडापाखें ब्यूगु हनां थःत थप प्रोत्साहन ब्यूगु धासें वय्कलं लिपाया कासाय् नं अज्याःगु हे लिच्वः हयेगु कुतः यायेगु धयादीगु दु ।
वडा सदस्य नानीहेरा महर्जनं न्ह्याकादीगु ज्याझ्वःया समापन यासें वडाध्यक्ष महर्जनं निकट भविष्यय् श्रेष्ठयात अझ तःधंगु हना ज्याझ्वः यायेगु घोषणा यानादीगु खः ।
