वइगु सेप्टेम्बर १९ निसें अक्टाेबर ४ तक जापानय् जुइगु एसियन गेम्सय् ब्वति काइपिं जुडाे कासामि व प्रशिक्षकयात सिटि स्क्वायरपाखें ग्वाहालि लःल्हाःगु दु ।
जुडाे प्रशिक्षण केन्द्र दशरथ रंगशालाय् सिटी स्क्वायरया प्रतिनिधि रवि स्यावां कासामि व प्रशिक्षकयात नगद ग्वाहालि लःल्हासें भिंतुना देछाःगु दु ।
नेपाल जुडाे महासंघया न्वकूलिसें एसियन गेम्सया निंतिं जुडाेया व्यवस्थापक व किपूया पूर्व प्रमुख रमेश महर्जनया समन्वयय् कासामिपिन्त ग्वाहालि लःल्हाःगु खः ।
सेेप्टेम्बरकाे ३० निसें जुइगु जुडाेका कासाय् ब्वति कायेत नेपालं मिसापाखे ५२ केजी क्वय् देवकीमाया श्रेष्ठ, ७० केजी क्वय् पुनम श्रेष्ठ व ४८ केजी क्वय् निशा श्रेष्ठं ब्वति काइगु जूगु दुसा मिजंपाखे ९० केजी क्वय् सुजन गुरूङ, ६६ केजी क्वय् विशेष विक व ६० केजी क्वय् विकास विकं ब्वति काइगु जूगु दु । एसियन गेम्सया निंतिं सुनिता मगर ताम्राकारं प्रशिक्षकया भाला कयादीगु दु ।
जुडाे कासामि पुनम श्रेष्ठ १३ औं सागया स्वर्णपदक विजेता खः । वं सन् २०१८ य् जाकार्ताय् जूगु एसियन गेम्सय् न्हसगूगु थाय् काःगु खःसा सन् २०१३ य्र बिस्केक एसियन ओपनय् कास्य पदक त्याकूगु खः ।
मिजं जुडोपाखेया अाश यानातःम्ह कासामि विकास विक ६० केजी क्वय्या विधाय् धेंधेंबल्ला याइ । हाङ्झाउइ ग्वसाःग्वःगु १९ क्वःगु एसियन गेम्सय् वं राउण्ड अफ ३२ य् कम्बोडियाया कासामियात इप्पाेनपाखें बुकाः अन्तर्राष्ट्रिय मञ्चय् प्रभावशाही प्रदर्शन याःगु खः ।
युवा लिसें उदीयमान कासामि निशा श्रेष्ठं ४८ केजीक्वय्या विधाय् नेपाःया प्रतिनिधित्व यानाच्वंगु दु । वं सन् २०२५ य् बङ्गलादेशय् जूगु बीकेएसपी कप इन्टरनेसनल जुडो च्याम्पियनसिपय् स्वर्ण पदक त्याकूगु खः । निशां एसियन क्याडेट व जुनियर जुडाे च्याम्पियनशीपय् तकं ब्वति काये धुंकूगु दु ।
५२ केजि क्वय्या विधाय् धेंधेंबल्ला याइम्ह देवकी माया श्रेष्ठ ताःइलंनिसें जुडाे कासाय् सक्रिय कासामि खः । कासामिलिसें सहायक प्रशिक्षककथं नं याेगदान बियाच्वनादीम्ह देवकीं थाइल्याण्ड, लेबनानलिसेंया देसय् जूगु एसियन जुनियर जुडो च्याम्पियनसिपय् नेपाःया प्रतिनिधित्व याये धुंकूगु दु ।
विशेष विक नेपाली मिजं जुडोया युवा प्रतिभा खः । ६६ केजीक्वय्या विधाय् धेंधेंबल्लाः याइम्ह वं सन् २०२५ य् बंगलादेशय् जूगु बीकेएसपी कप आमन्त्रित अन्तर्राष्ट्रिय जुडो प्रतियोगिताय् स्वर्ण पदक त्याकूगु दु । थीथी संस्करणया जुनियर एसियन च्याम्पियनसिपय् ब्वति काये धुंकूम्ह विशेषयाके अन्तर्राष्ट्रिय प्रतिस्पर्धाया बांलाःगु अनुभव दु ।
९० केजी क्वय्या ग्यसु पुलय् नेपाःपाखें सुजन गुरुङं धेंधेंबल्ला याइगु जूगु दु । घरेलु कासाय् निरन्तर उत्कृष्ट प्रदर्शन यासें राष्ट्रिय टोलीइ थाय् दयेकूम्ह सुजन शारीरिक रूपं बल्लाःम्ह व आक्रामक शैलीया कासामिकथं म्हस्यू । एसियन गेम्सपाखें अन्तर्राष्ट्रिय कासाय् पलाः न्ह्याकेत्यंम्ह वय्कलं थःगुअनुभव व शक्ति उपयोग यासें उत्कृष्ट नतिजा पिकाइगु ताःतःगु दु ।
