नेवा: पत्रकार राष्ट्रिय दबू बागमती प्रदेशया न्हापांगु सम्मेलनपाखें विराजकाजी राजोपाध्यायया नायःसुइ न्हूगु ज्यासना पुचः ल्यःगु दु ।
उगु तःमुँज्यां येँया विराजकाजी राजोपाध्याय नायः, चितवनपाखें विनोद श्रेष्ठ व येँपाखें कुसुम बज्राचार्ययात न्वकु, यलं सनीराज शाक्य छ्याञ्जे, काभ्रेपाखें विश्वनाथ ताम्राकार व येँपाखें विष्णुदेवी महर्जन ल्यूछ्याञ्जे व दांभरिं ख्वपपाखें श्यामकुमार था ल्यःगु दु ।
अथे हे दुजलय् येँपाखें मदनराम कर्माचार्य व सुरज मानन्धर, यलं राजु महर्जन ‘जुजु’, ख्वपं दीपक कायस्थ श्रेष्ठ व ज्ञानदेव श्रेष्ठ व काभ्रें पुनमाया कर्माचार्य (श्रेष्ठ) दुथ्याः ।
कार्यसमिति ल्यये न्ह्यः ग्वसाः ग्वःगु उलेज्याझ्वलय् नेवाः पत्रकार राष्ट्रिय दबूया केन्द्रीय न्वकू व संगठन विभागया संयोजक सुरेन्द्रभक्त श्रेष्ठया सभापतित्वय् जूगु खः । दबूया केन्द्रीय नायः नृपेन्द्रलाल श्रेष्ठ मूपाहां कथं ब्वति कयादीगु खः ।
ज्याझ्वलय् मूपाहां श्रेष्ठं दबूया विधान व नेपाःया संविधान कथं संस्थाया संरचना दयेकागु जानकारी बियादीगु खः । दबूया न्याक्वःगु महाधिवेशनया झ्वलय् थीथी जिल्लाया महाधिवेशन क्वचायेवं न्हापांगु प्रदेश अधिवेशनकथं बागमती प्रदेश गठन जूगु वय्कलं धयादिल ।
वय्कःया कथं संस्थाया स्थानीय, जिल्ला, प्रदेश व संघीय प्यंगू तहया संरचना दयेकूगु दु । लिसें वय्कलं विदेशय् च्वंपिं नेवाः पत्रकारतय्त संस्थानाप स्वानाः विदेशी कचात स्वनागु खँ नं जानकारी बियादिल ।
श्रेष्ठं थःगु कार्यकालय् न्हापांगु व निक्वःगु अन्तर्राष्ट्रिय मातृभाषा पत्रकारिता सम्मेलनया ग्वसाः ग्वःगु व स्वक्वःगु अन्तर्राष्ट्रिय मातृभाषा पत्रकारिता सम्मेलनया नं संयोजन जूगु जानकारी बियादीगु दु । वय्कलं नवनिर्वाचित बागमती प्रदेश कार्यसमितिया कार्यकाल सुथां लायेमा धकाः भिंतुना बियादिल ।
ज्याझ्वःया विशेष पाहाँ व निवर्तमान नायः सुरजवीर बज्राचार्यं नेवाः पत्रकारतय्गु जिम्मेवारी पत्रकारिताय् जक सीमित मजूगु धयादिल । भाषा, साहित्य व संस्कृति ल्यंकेत नेवाः पत्रकारतय् महत्वपूर्ण भूमिका दूगु खँ न्ह्यथनादिसें वय्कलं सम्भव जुइबलय् नेवाः समुदायया दुजःपिन्त नेवाः भासं खँल्हाबल्हा यायेत इनाप यानादिल । वय्कलं नेवाः भासं खँल्हाबल्हा याये मफुसां कमसेकम नेवाः भासं अभिवादन यायेगु बानी दयेकेमाःगु धयादिल ।
ज्याझ्वलय् कोषाध्यक्ष बाबुकाजी श्रेष्ठं न्हूगु निर्वाचित कार्यसमितियात भिंतुना देछानादीगु खः ।
दबूया मूछ्याञ्जे केके मानन्धरं बागमती प्रदेशया न्हापांगु महाधिवेशन क्वचाःगु लसताया नापनापं ऐतिहासिक क्षण जूगु धयादिल । वय्कलं न्हूगु निर्वाचित नेतृत्वया कार्यकाल सुथां लायेमा धकाः कामना यासें स्थानीय, जिल्ला, प्रदेश व संघीय प्यंगू तहया सांगठनिक संरचनाया माध्यमं हलिंन्यंकंया नेवाः पत्रकारपिन्त छगू हे संस्थागत दबुलिइ छप्पँ यायेगु कुतः जुयाच्वंगु जानकारी नं बियादिल ।
येँ जिल्ला नायः रत्नकाजी महर्जनं थीथी जिल्लाया सहभागी प्रदेश सभा दुजःपिन्त न्हूगु नेतृत्व निर्वाचनया निंतिं भिन्तुना देछासें प्रदेश समिति गठन जुइधुंकाः जिल्ला व केन्द्र दथुइ प्रभावकारी समन्वय व सहकार्यया ताँ जुइगु विश्वास प्वंकादिल ।
अथे हे काभ्रे जिल्लाया नायः शम्भुलाल श्रेष्ठं न्हूगु कार्यसमितियात भिंतुना देछानादीगु खः । धादिङ जिल्लाया अध्यक्ष सन्तोष श्रेष्ठं जिल्ला समिति गठन लिपा केन्द्रलिसेया गतिविधि व समन्वयय् छुं कमी कमजोरी जूगु टिप्पणी यासें वइगु दिनय् सुधार यानाः प्रभावकारी समन्वय व सहकार्यया लिसें न्ह्यःने वनेत इनाप यानादिल ।
न्हूगु निर्वाचित बागमति प्रदेश कार्यसमितिं नेवाः पत्रकारतय्गु व्यावसायिक क्षमता अप्वयेकेगु, नेपालभाषाया पत्रकारितायात प्रवद्र्धन यायेगु, अले नेवार समुदायया भाषा, साहित्य, कला, संस्कृतिया संरक्षण यायेगु ज्याय् अझ सक्रिय भूमिका म्हितीगु आशा याःगु दु ।