२७ क्वःगु फाेनिज स्थापना दिवस : थीथी व्यक्तित्वपिन्त हना व सिरपाः, स्वक्वगु अन्तर्राष्ट्रिय मातृभाषा पत्रकारिता सम्मेलन क्वचाल

आदिवासी जनजाति पत्रकार महासंघ (फोनिज) नीस्वंगु २७ दँ क्यंगु लसताय् २७ क्वःगु स्थापना दिवस श्रावण २७ गते बुधवाः तःजिक हंगु दु । फोनिज स्थापना दिवसया लसताय् जूगु स्वक्वःगु अन्तर्राष्ट्रिय मातृभाषा पत्रकारिता सम्मेलनया समापनलिसें जूगु ज्याझ्वलय् थीथी व्यक्तित्वपिन्त हना व सिरपाः लःल्हाःगु खः ।
स्थापना दिवसया लसताय् येँ महानगरपालिकाया कार्यवाहक प्रमुख सुनिता डंगोलया मूपाहाँसुइ जूगु ज्याझ्वलय् फोनिजया संस्थापकलिसें पूर्वनायः दण्ड गुरुङ, बिमला तुम्खेवा व नेपालभाषाया वाःपौ लहना वाःपौयात नगद ३१ द्वःलिसें विशेष हना देछाःगु खः ।
थुकथं हे पत्रकारपिं सरिता श्रेष्ठ, तीर्थमान बल व अविनाश चौधरीयात फोनिज राष्ट्रिय पत्रकारिता सिरपा लःल्हाःगु खः । थुगु सिरपाः म्हतिं २५ द्वःलिसें दसिपौ लःल्हाःगु खः ।
फोनिजया नायः लक्की चौधरीया सभापतित्वय् जूगु ज्याझ्वलय् स्वक्वःगु अन्तर्राष्ट्रिय मातृभाषा पत्रकारिता सम्मेलन तःजिक क्वचायेकेगु निंतिं ग्वाहालि याःपिं थीथी व्यक्तित्व व थीथी देसं ब्वति काःपिं प्रतिनिधिपिन्त मतिनाया चिंलिसें दसिपौ लःल्हाःगु खः ।
ज्याझ्वलय् न्हापांगु व निक्वःगु अन्तर्राष्ट्रिय मातृभाषा पत्रकारिता सम्मेलन तःजिक क्वचायेकूगु व स्वक्वःगु सम्मेलनया संयोजन याःगुलिं नेवाः पत्रकार राष्ट्रिय दबूयात विशेष सम्मान याःगु खः ।
स्वन्हुतक न्ह्याःगु स्वक्वःगु सम्मेलनया न्हापांगु न्हि नेपाल सरकारया कानून मन्त्री सोविता गौतम मूपाहाँकथं झायादीगु खःसा शिक्षामन्त्री सस्मित पोखरेल विशेष पाहाँकथं झायादीगु खः ।
सम्मेलनया झ्वलय् थीथी ज्यापौ न्ह्यब्वयेगुलिसें संस्कृति, जलबायु परिवर्तन, म्हसीका व डिजिटल प्रविधियात कयाः विज्ञपिनिलिसे सहलह ब्याकूगु खः ।