विश्वया दकलय् महत्वपूर्ण समुद्री व्यापारिक मार्ग कथं कयातःगु होर्मुज जलसन्धिया विवादयात कयाः चीनं स्पष्ट प्रतिक्रिया बिउगु दु । अमेरिकी राष्ट्रपति डोनाल्ड ट्रम्पं उगु क्षेत्र अवरुद्ध यायेगु ख्याच्वः बिइधुंकाः चीनं थुकी आपत्ति प्वंकूगु खः ।
अप्रिल १२ तारिखय् ट्रम्पं थःगु सामाजिक संजाल प्लेटफर्म ट्रुथ सोशलपाखें अमेरिकी नौसेनां होर्मुज स्ट्रेट जुयाः वनीगु जहाजयात नाकाबन्दी सुरु यायेगु घोषणा याःगु खः । वय्कलं मेमेगु देय्त नं थुकी दुथ्यायेफुगु संकेत बियादीगु दु ।
थुकिया लिसलय् चिनियाँ विदेश मन्त्रालयया प्रवक्ता गुओ जियाकुनं नियमित पत्रकार सम्मेलनय् धयादी, “हर्मुज स्ट्रेट विश्वव्यापी चिकं व ग्यास आपूर्तिया निंतिं तसकं महत्वपूर्ण जलमार्ग खः, थुकिया सुरक्षा व निर्बाध मार्ग सुनिश्चित यायेगु अन्तर्राष्ट्रिय समुदायया साझा हितय् खः ।”
वय्कलं थप धयादी, “थुगु क्षेत्रय् तनाव अप्वयेकेगु छुं नं ज्याखँं विश्व अर्थतन्त्रय् नकारात्मक लिच्वः लाकेफु, उकिं अमेरिका व इरान निगुलिं देशं संयम जुयाः विवाद समाधान यायेगु दिशाय् न्ह्याःवनेमाः ।”
विश्वया चिकंया तःधंगु ब्व होर्मुज जलसन्धि जुयाः निर्यात जुइगु जूगुलिं उगु क्षेत्रय् छुं नं कथंया पंगः वःसा अन्तर्राष्ट्रिय बजारय् चिकंया मूल्यय् तच्वकं उतारचढाव वयेफुगु विज्ञतय्सं धाःगु दु ।
अन्तर्राष्ट्रिय समुदायं नं थुकियात गम्भीरतापूर्वक कयाः द्वन्द्व समाधानया निंतिं कूटनीतिक पहल यायेमाःगु खँय् बः बिउगु दु।
बिबिसीया ग्वाहालिं