नागार्जुन नगरपालिकाया मुँज्याकुथिइ ग्वसाःग्वःगु छगू विशेष ज्याझ्वःया दथुइ नागार्जुन नगरपालिका ६ स च्वंगु सीताराम माध्यमिक विद्यालय व दक्षिण कोरियाया सनमून विश्वविद्यालय दथुइ शैक्षिक ग्वाहालि कालबिल यायेगु आज्जुं समझदारी पतिइ ल्हाःचिं तयेगु ज्या जूगु दु ।
नागार्जुन नगरपालिकाया कार्यवाहक मेयर सुशीला अधिकारीया मूपाहाँसुइ जूगु उगु ज्याझ्वः नागार्जुन नगरपालीका–६ वडाध्यक्ष देवेन्द्रराज गिरीया सभानायःसुइ जूगु खः । ज्याझ्वलय् नपाया प्रमुख प्रशासकीय अधिकृत गणेशप्रसाद अर्याल, नपाया प्रवक्ता महेश रिमाल, शिक्षा शाखा प्रमुख कृष्णबहादुर कुँवर, सीताराम माध्यमिक विद्यालयया प्रधानाध्यापक प्रदीप पुरी, दक्षिण काेरियाया सनमून विश्वविद्यालयया प्रतिनिधिमण्डलया प्रमुख प्रा. यून चाे युन यी, निर्देशक याेङ-सुन ओह अनुवादक तेन्जिन नोर्बु लामा, समाजसेवी केशव श्रेष्ठलिसेंया ब्वति दुगु खः ।
औपचारिक एमओयू ज्याझ्वः धुंकाः सनमून विश्वविद्यालयया प्रतिनिधिमण्डलया प्रमुखया उपस्थितिइ सीताराम माध्यमिक विद्यालयया न्हू दयेकूगु क्यान्टिनया उलेज्या जूगु खः । अनंलि विद्यालय प्रशासन, नगरपालिकाया प्रतिनिधि व सनमून विश्वविद्यालयया पदाधिकारीपिनि दथुइ विशेष (भिआइपी) मुँज्या जूगु खः । अन वइगु शैक्षिक साझेदारी, विद्यार्थी व शिक्षक आदानप्रदान व सामुदायिक विकासयात कयाः ब्याकं सहलह जूगु धाःगु दु ।
वयां लिपा नागार्जुन नगरपालिकाया मुँज्याकाेथाय् जूगु ज्याझ्वलय् सीताराम माध्यमिक विद्यालय व सनमून विश्वविद्यालय दथुइ शैक्षिक कालबिल, शिक्षक व विद्यार्थीया क्षमता अप्वयेकेगु, अनुसन्धान, अन्तर्राष्ट्रिय साझेदारी व गुणस्तरीय शिक्षा प्रवद्र्धनया निंतिं समझदारी पतिइ ल्हाःचिं तयेगु ज्या जूगु खः । थ्व सहकार्यं विद्यालययात अन्तर्राष्ट्रिय शैक्षिक संजाललिसे स्वानाः विद्यार्थी व शिक्षकपिनिगु निंतिं विश्वस्तरीय स्यनेकनेया ह्वःताः चूलाइगु भलसा काःगु दु ।
सीताराम माध्यमिक विद्यालयस ग्वसाः ग्वःगु उगु ज्याझ्वः अन्तर्गत विद्यार्थीया समग्र विकासयात लक्षित यानाः थीथी गतिविधि न्ह्याकूगु खः । मू ज्याझ्वःत क्वय् बियातःकथं दु :
• प्राविधिक व कला ज्याझ्वः : प्राविधिक सीप विकास, सिर्जनात्मक कला व प्रतिभा प्रदर्शन सम्बन्धी गतिविधि।
• स्वास्थ्य ज्याझ्वः : स्वास्थ्य चेतना, व्यक्तिगत सुचुकुचु व आधारभूत स्वास्थ्य सेवा सम्बन्धी जानकारी बीगु ज्याझ्वः ।
• कासा ज्याझ्वः : थीथी कासाया धेंधेंबल्ला, शारीरिक फिटनेस व टिम बिल्डिङ गतिविधि।
• क्यारियर निर्माण ज्याझ्वः : नेतृत्व विकास, व्यक्तित्व विकास, क्यारियर योजना व भविष्यया अवसरया बारे अभिमुखीकरण ।
• कोरियन भाषा व संस्कृति ज्याझ्वः : कोरियन भाषा, संस्कृति, परम्परा व सांस्कृतिक आदानप्रदान पर विशेष प्रस्तुति व प्रशिक्षण।
विद्यार्थीपिनि दथुइ ज्ञान, सीप, आत्मविश्वास व सामाजिक जिम्मेवारीया भावना विकास यायेत थुपिं ज्याझ्वःतसें उल्लेखनीय योगदान याःगु विद्यालयं धाःगु दु ।
ज्याझ्वलय् नेपाःया सनमुन विश्वविद्यालयं न्ह्याकाच्वंगु ‘ग्लोबल कम्युनिटी’ अन्तर्राष्ट्रिय स्वयंसेवक ज्याझ्वः अन्तर्गत न्ह्याकेत्यंगु थीथी ज्याखँया जानकारी नं ब्यूगु खः । ज्याझ्वः कथं कोरियन भाषा व संस्कृति स्यनेगु, कोरियन कला तालिम, विद्यार्थी केन्द्रित शिक्षण, क्यारियर निर्माण अभिमुखीकरण, खेलकुद तालिम, स्वास्थ्य सेवा शिविर, सामुदायिक सेवा, मैत्री ज्याझ्वः, वृक्षारोपण, सांस्कृतिक व उपहार आदानप्रदान थेंज्याःगु ज्याझ्वःत न्ह्याकेगु खँ न्ह्यथनातःगु दु ।
विश्वविद्यालयं पिथंगु छगू प्रेस विज्ञप्तिइ धयातःगु दु, उगु ज्याझ्वलं स्थानीय समस्या पहिचान यानाः समाधान मालेगु प्रक्रियापाखें विद्यार्थीपिनिके सृजनशीलता, नेतृत्व क्षमता, सेवा भावना व सामाजिक दायित्व अभिवृद्धि याइगु जूगु दु । बहुसांस्कृतिक आदानप्रदान व थःथवय् समझदारीपाखें समावेशी समाज निर्माणय् योगदान यायेगु उद्देश्य दुगु खँ नं न्ह्यथनातःगु दु ।
दक्षिण कोरियाया २८ म्ह दुजःया विद्यार्थी व कर्मचारीया पुचलं नागार्जुन नगरपालिका व स्थानीय विद्यालयलिसे सहकार्य यानाः शैक्षिक ग्वाहालि, स्वयंसेवा, नेतृत्व विकास व सांस्कृतिक सम्बन्ध विस्तार यायेगु ज्याय् सक्रिय भूमिका म्हितीगु जानकारी ब्यूगु दु । ज्याझ्वःया झ्वलय् वृक्षारोपण व समापन समारोहया ग्वसाः ग्वयेगु तालिका न्ह्यब्वःगु खः ।
उगु अवसरय् विद्यालय प्रशासनपाखें विद्यालयया शैक्षिक व भौतिक विकासय् योगदान बियादीपिं थीथी व्यक्ति व संघसंस्थापिन्त सम्मान व दुनुगलंनिसें सुभाय् देछाःगु खः ।
ज्याझ्वलय् उपस्थित वक्तापिन्सं स्थानीय सरकार, सामुदायिक विद्यालय व अन्तर्राष्ट्रिय शैक्षिक संस्थाया सहकार्यं सामुदायिक विद्यालयया गुणस्तर थकायेगु, विद्यार्थीया व्यक्तित्व विकास यायेगु, अन्तर्राष्ट्रिय अनुभव आदानप्रदान यायेगु व विश्वस्तरीय शैक्षिक अवसर सिर्जना यायेगु ज्याय् उल्लेखनीय योगदान बीगु विश्वास प्वंकूगु खः ।
सौहार्दपूर्ण लकसय् जूगु ज्याझ्वलं नेपाः व दक्षिण कोरिया दथुइ शैक्षिक, सांस्कृतिक, सामुदायिक स्वापू अझ बल्लाइगु व भविष्यय् दीर्घकालीन सहकार्यया निंतिं न्हूगु अध्याय चायेकूगु ब्वतिकामिपिनि धापू दु ।
