नेपालय् कोरोना त्रासया कारणं लकडाउन जुया च्वंगु इलय् नीस्वंगु चम्पावती स्मृति मेडिटेशन धम्म पुचःया ग्वसालय् पुचःया दुजःपिं लोचनतारा तुलाधरया निगू व डा.रीना तुलाधर बनियाया खुगू यानाः मुक्कं च्यागू सफू असार २७ गते शनिवाः मंकाःकथं उलेज्या जूगु दु ।
थुकथं उलेज्या जूगु च्यागू सफूतिइ लोचनतारा तुलाधरया “नेपालमा पालि भाषाको विकास” व “सिमा मदुगु गुँ” दुथ्याःगु खःसा डा. रीना तुलाधर बनियाया खुगु सफू “पालि भाषा सिकौं”, “रागाग्नी”, “अभिमन्यूया पुनर्जन्म”, “गणेद्यःया विलाप”, “मनोपु्ब्बङ्गमा धम्मा भाग १” व “मनोपु्ब्बङ्गमा धम्मा भाग २” खः ।
नेपालभाषा मिसा खलःया संस्थापक नायः सुवर्णकेशरी चित्रकारया मूपाहाँसुइ व्लुस्टार कम्प्लेक्सया आरम्भ बैंक्वेट एण्ड इभेन्टस्या सभाहलय् जूगु ज्याझ्वः मूपाहाँ चित्रकारं देवाय् मत च्याका उलेज्या यानादीगु खः । ज्याझ्वलय् मूपाहाँ चित्रकार, अष्टमान सिं बनिया, प्रा.अमृतमान सिं बनिया, प्रा. मदनरत्न मानन्धर, डा. पुष्पराज राजकर्णिकार, कवयित्री प्रतिशरा साय्मि, साहित्यकार रमेशकाजी स्थापित, डा. त्रिरत्न मानन्धरपिन्सं मंकाःकथं सफू उलेज्या यानादीगु खः ।
चम्पावतीया जेष्ठम्ह छय् लिसें प्रोफेश्वर निर्मलमान तुलाधरं लसकुस न्वचु बियाः न्ह्याःगु ज्याझ्वलय् उलेज्या जूगु सफूयात कयाः थीथी विद्वानपिन्सं समीक्षा नं यानादीगु खः । थुकथं समीक्षा यायगु झ्वलय् अभिमन्युया पुनर्जन्म सफूयात कयाः डा. पुष्पराज राजकर्णिकारं समीक्षा यानादीगु खःसा नेपालमा पालि भाषाको विकास सफूयात कयाः डा. त्रिरत्न मानन्धरं समीक्षा यानादीगु खः । अथेहे साहित्यकार एवं सम्पादक रमेशकाजी स्थापितं सिमा मदुगु गुँ सफूयात कयाः समीक्षा यानादीगु खः । थुकथं हे प्रा. मदनरत्न मानन्धरं पालि भाषा सिकौं सफूयात कयाः समीक्षा यानादीगु खः ।
ज्याझ्वलय् प्रा.अमृतमान सिं बनियां नेपालभाषा एकेदेमिया चान्सलर मल्ल के सुन्दर, कवयित्री प्रतिशरा साय्मि व सफूया च्वमिपिं लोचनतारा तुलाधर, डा. रीना तुलाधर बनियापिन्सं नं थःथःगु नुगः खँ तयादीगु खः । नुगः खँ प्वंकादीपिन्सं मिसापिन्सं नं कुतः यानावन धाःसा थुकथंया विकास याना वनेफु धैगु क्यं धकाः धयादिल । नापं मिसापिंके नं विकासया पुसा दु । उकिं चा अर्थात् वातावरण वा तिबः जक आवश्यक जुयाच्वंगुलिं चाया व्यवस्था यानाबिल धाःसा अःपुक हे समाजयात माःगु कथंया क्वातुगु ज्या याना वनेफु धकाः नं आशय प्वंकेगु याःगु दु ।
थुकथं हे वक्तापिन्सं च्वमिपिन्सं यानादीगु अथक कुतःयात सम्मान याय्गु धैगु हे वय्कःपिन्सं च्वयाः पिदंगु सफू अध्ययन याय्गु खः धकाः नं धयादीगु दु । नापं झी बौद्ध जुया नं बुद्धं ल्हाना विज्यागु भाषा मसःगु अवस्था दु । उकिं थौं पालि भाषाया विकास व पालि भाषा सय्केगु सफू तकं पिदंगु अवस्थाय् उगु सफू अध्ययन याना नं पालि भाषा सय्का वनेमाःगु खँय् बः बियादीगु दु ।
बाखँ च्वमि मीना बज्राचार्यं न्ह्याकादीगु थुगु लसतां जाःगु ज्याझ्वःया अन्तय् मीना तुलाधरं सुभाय् न्वचु बियादीगु खःसा ज्याझ्वःया अन्तय् मूपाहाँ सुवर्ण केशरी चित्रकारं थःगु नुगः खँ तयाः सभा क्वचायकादीगु खः ।
