हलिं नेवाः दबू (डब्लुएनओ) या केन्द्रीय पुचःपाखें वरिष्ठ न्वकु समीर महर्जनया नेतृत्वय् व गैर-आवासीय नेपाली संघ (एनआरएनए) या उपाध्यक्ष लिसें टेक्सबरी बरो काउन्सिलया काउन्सिलर रोजिना प्रधान राइ दथुइ शुक्रवाः छगू मुँज्या जूगु दु ।
मुँज्याय् नेपाल व विश्वव्यापी डायस्पोराय् च्वनाच्वंपिं नेवाः समुदायया उत्थान व सशक्तीकरणया निंतिं डब्लुएनओ व एनआरएनए दथुइ सहकार्ययात अझ बल्लाकेगु खँय् दुग्यंक सहलह जुल ।
सहलहया झ्वलय् नेवाः समुदायया समृद्ध सांस्कृतिक सम्पदाया संरक्षण व प्रवर्द्धनयात प्राथमिकता बियातःगु खः । थ्व झ्वलय् नेपाल भाषा, रञ्जना लिपि व प्रचलित लिपि थुज्वःगु परम्परागत भाषिक सम्पदाया लिसें नखःचखः, कला, वास्तुकला व आदिवासी ज्ञान प्रणालीतय्गु संरक्षण, संवर्द्धन व प्रवर्द्धन यायेगु खँय् मू रूपं सहलह जूगु खः ।
मुँज्याय् नेपालभाषायात डिजिटल माध्यमपाखें विश्वव्यापी दयेकेगु कुतःयात नं प्राथमिकताय् तःगु दु । विशेषयानाः Google Translate थुज्वःगु अन्तर्राष्ट्रिय प्लेटफर्मत नेपालभाषायात समावेश यायेगु कुतःयात तीव्रता बीमाःगु खँय् ब्वतिकाःपिसं बः ब्यूगु खः । थुकिं भाषा पहुँच, छ्यला व अन्तर्राष्ट्रिय मान्यता अप्वयेकेत महत्वपूर्ण भूमिका म्हितीगु विश्वास प्वंकूगु खः ।
नेवाः समुदाय नेपाःया ऐतिहासिक, सांस्कृतिक व शहरी विकासय् महत्वपूर्ण योगदान ब्यूगु सभ्यतामध्ये छगु जूगु खँ न्ह्यथसें मुँज्याय् थुगु सम्पदाया दीर्घकालीन संरक्षण याये माःगु खँ तःगु खः । लिसें, हलिंन्यंकं च्वंपिं युवा पुस्तायात थःगु सांस्कृतिक हा व म्हसीकालिसे स्वाना तयेत थीथी ज्याझ्वःत न्ह्याकेगु खँय् नं सहलह जूगु खः ।
मुज्यां मंकाः कुतः, सांस्कृतिक कालबिल ज्याझ्वः, भाषा संरक्षण अभियान व अन्तर्राष्ट्रिय स्तरय् वकालतया ह्वःताः मालेगु निर्णय याःगु खः ।
निगुलिं पक्षं नेवाः समुदायया एकता, सांस्कृतिक गौरव व दिगो विकासयात प्रवर्द्धन यायेगु अज्जुं दीर्घकालीन व अर्थपूर्ण साझेदारी ब्वलंकेगु प्रतिबद्धता प्वंकूगु खः ।
मुँज्याय् डब्लूएनओपाखें वरिष्ठ न्वकू महर्जनलिसें न्वकूपिं सुरेन्द्रभक्त श्रेष्ठ व बिमल श्रेष्ठ, मूछ्याञ्जे लालिमा श्रेष्ठ, मूदुजः अञ्जना ताम्राकारया ब्वति दुगु खः ।