येँया तोखा–९ ग्वंगःबुँ दीपज्योतिइ च्वंगु मुक्तेश्वर महाद्यः देगः लागाय् पलिस्था यानातःगु ग्वंगःबुँ भैरव व बुद्ध मूर्तिया प्राणपलिस्था यायेगु ज्या थ्व हे बुधवाः जुल ।
ग्वंगःबुँ भैरव संरक्षण तथा व्यवस्थापन मूल समिति तोखा–९ ग्वंगःबुँया ग्वसालय् उगु ज्या क्वचाःगु खः ।
सुरेश बज्राचार्यं तान्त्रिक विधिपाखें गौतम बुद्ध व भैरवया मूर्तिया प्राण पलिस्था यानादीगु खः । प्राण पलिस्था ज्याझ्वलय् पूर्णनारायण मानन्धर वय्कःया तिरिमय्जु सानुनानी मानन्धर व रविन मानन्धरलिसें वय्कःया तिरिमय्जु कल्याणी श्रेष्ठपिन्सं जयमांकथं ज्या न्ह्याकादीगु खः ।
कुमार रंजितया संयोजकत्वय् ग्वंगःबुँ भैरवया मूर्ति दयेकूगु खः । उगु हे समितिया सक्रियताय् दयेकूगु मूर्तिया प्राण पलिस्था ज्या जूगु खः ।
ज्याझ्वःया व्यवस्थापन व सहजीकरणया भूमिका स्थानीय समाजसेवी लिसें संस्कृतिकःमि रत्नप्रसाद अनामणि श्रेष्ठ लगायतयापिसं यानादीगु खः । प्राण प्रतिष्ठा समारोह लिपा समय् बजि प्रसाद इनाः ज्याझ्वः क्वचायेकूगु खः ।
