सुर संसार मिडियाया नायःलिसें मिडियापाखें पिदनाच्वंगु न्हाय्कं डटकमया प्रधान सम्पादक सुनिता महर्जनयात लहना गाैरवं छाये पिउगु दु ।
लहना वाःपाै १३ दँ क्यंगु लसताय् जूगु विशेष ज्याझ्वलय् वय्कलं न्ह्याकाच्वनादीगु सुर संसार मिडियापाखें वाःपाैया समाः ज्या यानाः ग्वाहालि यानावयाच्वंगुलिं वय्कःयात उगु हना देछाःगु खः ।
शुक्रवाः प्रतिनिधिसभाया दुजः कुलभक्त शाक्यया मूपाहाँसुइ जूगु ज्याझ्वलय् वय्कःलिसें लहना वाःपाैयात थीथी कथं ग्वाहालि यानावयाच्वनादीपिन्त लहना गाैरवपाखें हंगु खः ।
थ्व हे झ्वलय् लहना वाःपाैया बुसादँया लसताय् लःल्हाना वयाच्वंगु थीथी सिरपाः नं लःल्हाःगु दु ।
थुगुसी लहना धर्म-माेति पत्रकारिता सिरपाःपाखें ने.सं. ११४५ या निंतिं राजु नापित व ११४६ या निंतिं उत्तम श्रेष्ठयात छायेपिउगु दुसा लहना केशव-कृष्णवदन मातृभाषा पत्रकारिता सिरपाः पाखें ११४५ या निंतिं केके मानन्धर व ११४६ या निंतिं शकुन्तला महर्जन, लहना सूर-शर्मिष्ठा सम्मानपाखें ११४५ या निंतिं पवन जाेशी व ११४६ या निंतिं अाराध्यालक्ष्मी खड्गीयात हंगु दु ।
थुकथं हे थुगुसी नेपालभाषाया न्हापांगु न्हिपाै विश्वभूमिया सम्पादक सुशील वीरसिंह कसाःया नामं वय्कःया दाजु जगत वीरसिंह कसालं स्वनादीगु लहना-सुशील वीर सिंह पत्रकारिता सिरपाः वरिष्ठ पत्रकार सुनिल महर्जनयात लःल्हाःगु दु ।
थथे हे नेपालभाषा पत्रकारिता ख्यःयात तिबः बियावयाच्वनादीम्ह समाजसेवी डा. विजयप्रकाश सैंजुं थः मां व अबुया नामं स्वनातःगु सप्तविष्णु प्रतिष्ठानपाखें छुं इ न्ह्यः जक दिवंगत जुयादीम्ह पत्रकार सुरेश किरण मानन्धरयात देछाकथं स्वनादीगु लहना-सुरेशकिरण पत्रकारिता सिरपाः वरिष्ठ कार्टुनिष्ट रविन साय्मियात लःल्हाःगु दु ।
ज्याझ्वलय् येँ मनपाया पूर्व मेयर विद्यासुन्दर शाक्य विशेष पाहाँकथं झायादीगु खः ।
ज्याझ्वलय् पाहाँकथं नेवाः देय् दबूया नायः रश्मिला प्रजापति, हलिं नेवाः दबू नेपाः देय् मूकवःया नायः रमेशमान मुनिकार, प्रेस काउन्सिल नेपाःया प्रशासकीय अधिकृत झविन्द्र भुसाल, नेपाल अादिवासी जनजाति पत्रकार महासंघ (फाेनिज)या नायः लकी चाैधरीलिसेंयापिंसं ब्वति कयादीगु खः ।
सिरपाः त्याकादीपिं व हना ग्रहण यानादीपिं सकसितं न्हाय्कं डटकमपाखें भिंतुना देछानाच्वना ।