राष्ट्रपति रामचन्द्र पौडेलन्ह्यःने महालेखापरीक्षकया आर्थिक दँ २०८१/८२ या वार्षिक प्रतिवेदन पेस जूगु दु । राष्ट्रपति भवनय् थौं ग्वसाःग्वःगु विशेष ज्याझ्वलय् राष्ट्रपतिन्ह्यःने महालेखापरीक्षक तोयम रायां उगु प्रतिवेदन पेस यानादिल । उगु झ्वलय् राष्ट्रपति पौडेलं अप्वयावनाच्वंगु बेरुजुप्रति चिन्ता प्वंकादिसें सार्वजनिक निकायं जवाफदेहिता, पारदर्शिता व आर्थिक अनुशासन कायम यायेमाःगुलिइ बः बियादिल । “बेरुजु फछ्र्योट यानाः वित्तीय अनुशासन कायम यायेगु दिशापाखे न्ह्यचिलेत सार्वजनिक निकायया पदाधिकारीपिं अझ अप्वः जवाफदेही जुइमाः”, वय्कलं धयादिल । राष्ट्रपति पौडेलं फजुल खर्चयात निरुत्साहित यानाः आर्थिक अनुशासन कायम जूसा मुलुकय् दिगो, शान्ति, सुशासन, विकास व समृद्धिया आकाङ्क्षा पूवनीगु विश्वास प्वंकादिल । प्रतिवेदनं क्यंगु विषयवस्तु सम्बन्धित निकाय व सरोकार दुपिंत जवाफदेही जुइत प्रेरित याइगु विश्वास नं राष्ट्रपतिं प्वंकादिल । बेरूजु पाः यानाः आर्थिक अनुशासन, जवाफदेहिता, पारदर्शिता कायम यायेत महालेखापरीक्षकया ज्याकुथिया भूमिका महत्वपूर्ण जुइगु जूगुलिं भविष्यय् नं संस्थागत क्षमता, पेसागत हित अभिवृद्धि व आन्तरिक सुशासन कायम यायेगुपाखे ज्याकुथि अझ क्रियाशील जुइमाःगुलिइ राष्ट्रपति पौडेलं बः बियादिल ।
