दिगो विकास, सामाजिक समावेशिता व छेँजःपिनिगु क्वातूगु भूमिकाय् केन्द्रित जुयाः थौं विश्वया थी थी देशय् थी थी ज्याझ्वः ग्वसाःग्वयाः अन्तरराष्ट्रिय छेँजः दिवस हनेत्यंगु दु ।
थ्व हे झ्वलय् संयुक्त राष्ट्रसङ्घया मू ज्याकुथिइ वइगु निक्वःगु विश्व सामाजिक विकास शिखर सम्मेलनया तयारीकथं दिगो विकासया निंतिं नीतिगत समाधानबारे विशेष सहलह जुइत्यंगु खः ।
सन् १९८० या दशकनिसें छेँजःलिसे सम्बन्धित विषयय् राष्ट्रसङ्घं विशेष ध्यान बियाहःसां नं आर्थिक नापं सामाजिक परिषद्या सिफारिसय् सामाजिक विकास आयोगं सन् १९८३ य् ‘विकास प्रक्रियाय् छेँजःपिनिगु भूमिका’ सम्बन्धी प्रस्ताव पारित यानाः छेँजःपिनिगु समस्या, आवश्यकता नापं समाधानया उपायबारे विश्वन्यंकं जनचेतना थनेत महासचिवयात इनाप याःगु खः ।
राष्ट्रसङ्घया कथं सन् १९८५ य् परिषदं महासभायात ‘विकास प्रक्रियाय् छेँजः’ शीर्षकयात थःगु ज्याधलखय् दुथ्याकेत सुझाव ब्यूगु खः । अनंलिपा दुजः देय्या धारणा व प्रस्तावया आधारय् छेँजःपिनिगु अवस्था व कल्याण सुधार यायेगु लिसें सामाजिक विकासया निंतिं अन्तरराष्ट्रिय सहकार्य अप्वयेकेगु कुतः न्ह्याकूगु खः ।
महासभां सन् १९८९ य् ‘अन्तर्राष्ट्रिय छेँजः दँ’ घोषणा याःगु खः । अनंलिपा सन् १९९३ य् पारित प्रस्तावकथं दँय्दसं मे १५ यात अन्तरराष्ट्रिय छेँजः दिवसकथं हनेगु निर्णय जूगु खः । थ्व दिवस सन् १९९४ निसें औपचारिक रूपं विश्वन्यंकं हनेगु यानाहःगु खः ।
अन्तरराष्ट्रिय छेँजः दिवसं छेँजःपिंलिसे सम्बन्धित सामाजिक, आर्थिक नापं जनसाङ्ख्यिक प्रक्रियाबारे चेतना थनेगु ह्वःताः चूलाकीगु विश्वास यानातःगु खः । राष्ट्रसङ्घया १९३ दुजः देशं सन् २०१५ य् अनुमोदन याःगु दिगो विकास आज्जु पूवंकेत छेँजः व छेँजःपिंत पाय्छि जूगु नीति व ज्याझ्वःयात महत्वपूर्ण आधारकथं कयातःगु खः । गरिबी न्यूनीकरण, विभेद अन्त्य, सामाजिक सुरक्षा नापं समावेशी विकासया आज्जु पूवंकेत छेँजःपिनिगु भूमिकायात विशेष महत्व बियातःगु खः ।