नेपालभाषा सेवी, व्याकरणविद, जगतसुन्दर ब्वनेकुथिया संस्थापक लिसे नेवाः आन्दोलनया न्ह्यलुवा विष्णु चित्रकार थाैं सुथय् ३ बजे नुगःचुया ल्वचं आकाझाकां मन्त ।
वय्कः मुक्तिनाथ व अपर मुस्ताङ चाःहिलेत झायादीगु झ्वलय् आकाझाकां मदुगु खः ।
मदुम्ह व्याकरणविद् चित्रकार नेपाल संवत्या तिथि तुत मजुइकथंया नगुमा पिथनेगु ज्याय् न्ह्यचिलादीम्ह खः । वय्कलं नेपाल लिपि युनिकोड दर्ताया निंतिं नं ज्या यानादीगु खः ।
उकथं हे वय्कलं नेपालभाषाया व्याकरण व भाषा सयेकेगु सफू च्वयादीगु खः । वय्कःया लिपांगु सफू थः व कतः नेपालभाषा सयेकेगु सफू पिदंगु खः ।
७६ दँय् मदुम्ह वय्कःया जहान भाषासेवी विद्या चित्रकार व म्ह्याय् सिचु चित्रकार दु । जहान विद्या चित्रकार नं वय्कःनापं मुस्ताङ भ्रमणय् झाया च्वनादीगु खः ।