नेवाः पत्रकार राष्ट्रिय दबूया ग्वसालय् थौं संस्कृति सम्पदा संरक्षणय् पत्रकारिताया भूमिका विषयक गोष्ठी जुल ।
येँ मनपाया प्रवक्ता लिसे १७ वडाया नायः नवीन मानन्धरया मूपाहाँसुइ जूगु ज्याझ्वलय् दबूया वरिष्ठ न्वकू सुनिल महर्जनं लसकुस यानादीगु खः ।
ज्याझ्वलय् विषयप्रवेश याकादिसें पत्रकार विराजकाजी राजोपाध्यायं संस्कृति सम्पदाया पत्रकारितायात थौंकन्हय् ब्यागलं विटकथं कायेगु म्हो जुयावंगु व मेमेगु विटया पत्रकारं हे संस्कृतिया समाचार च्वयेगु यानाच्वंगु खँ तयादिल ।
वय्कलं संस्कृति सम्पदाया पत्रकारिता घटना प्रधान जुयाच्वंगु व अझ न्हापाया दँय्च्वःगु समाचारयात हे लिसाकयाः न्ह्यथनेगु ज्या वुयाच्वंगु तर संस्कृतिया दुवाला मजूगु खँ तयादिल । 
ज्याझ्वलय् नुगःखँ तयादिसें संस्कृतिविद् जितेन्द्र विलास बज्राचार्यं संस्कृति परम्पराय् ईकथं हिउपाः वयाच्वंगु खँ कनादिल । संस्कृति सम्पदाया समाचार च्वयावयाच्वंगु सकारात्मक जूगु धासें पत्रकारितां हे संसकृतिया दस्तावेजिकरण जुया वनीगु खँ तयादिल ।
ज्याझ्वलय् नुगःखँ तयादिसें दबूया मूछ्याञ्जे केके मानन्धरं मेनस्ट्रिम व न्यूमेडिया निगुलिं मेडियाय् राजनीतिक मुद्दायात प्राथमिकता बीगु यानावयाच्वंगु व थ्व उच्च तहया नीति खःगुलिं स्वभाविक जूगु खँ तयादिल । वय्कलं राजनीतिं विचारया आधारय् मनूयात विभक्त यानाबीगु खँ तयादिल । थुकिया अःखः संस्कृतिं सकसितं स्वाइगु जूगुलिं थकिया पत्रकारिता अत्यन्त आवश्यक जूगु खँ तयादीगु दु ।
वय्कलं संस्कृति व सम्पदा संरक्षण जक मखु थुकिया सही व गलत थुइकाः उकियात सहि ढंगं न्ह्यब्वयेमाःगु खँ तयादिल ।
नेपाल आदिवासी जनजाति पत्रकार महासंघ (फोनिज)या मूछ्याञ्जे समीर बलामिं झी पत्रकार जक जुया च्वनेगु कि खोजमूलक पत्रकारिता यायेगु धइगु न्ह्यसः तयादिल ।
वय्कलं थौंकन्हय् नेपाःया पत्रकारिता थौ्ंकन्हय् भःन्हुयाच्वंगु खँ तयादिल ।
ज्याझ्वलय दबूया पूर्वनायः सुरजवीर बज्राचार्यं संस्कृति सम्पदाया संरक्षणया निंतिं लिपिया संरक्षण नं आवश्यक जूगु खँ तयादिल ।
ज्याझ्वलय् नुगःखँ तयादिसें दबूया सल्लाहकार लिसें गुथि संस्थानया पूर्व प्रमुख किरण शाक्यं संस्कृति सम्पदाया दँय्दसं लाइभ जक यानाः छुं फाइदा मजूगु धात्थें पत्रकारिता यायेगु खःसा थुकिया दुनेया खँया रिपोर्ट दयेके माःगु खँ दुवालाः न्ह्यब्वयेमाःगु खँ तयादिल ।
ज्याझ्वःया मूपाहाँ मानन्धरं नेवाःत छथाय् छाय् च्वने मफुगु खँ तयादिल । यँयाः जात्राय् गुथि संस्थानं म्हितावयाच्वंगु भूमिका थःगु थासय् दुगु व उकी येँ मनपां नं ग्वाहालि यानाच्वनागु खँ।तयादिल । वय्कलं थःगु पहलं यँयाःया लाखे, पुलुकिसि व सवःभकुयात निश्चित बजेट छुटे याना बियागुयात बी दइ मखु धकाः छथ्वलं दवाव बियाच्वंगु खँ तयादिल ।
वयकलं झीगु मू आधार धयागु हे कल्चर व एग्रीकल्चर जूगु खँ नं तयादिल । कल्चरं गौरव बीगु व एग्रीकल्चरं ज्या बीगु खँ तयादिल ।
ज्याझ्वलय् सुभाय् न्वचु बियादिसें दबूया नायः लिसें सभानायः नृपेन्द्रलाल श्रेष्ठं हनुमानढोका दरवार क्षेत्र संरक्षण ज्याझ्वःया ग्वाहालिं ज्या न्ह्याके खंगु खँ तयादिसें ज्याझ्वलय् झायादीपिं सकसितं सुभाय् देछानादिल ।
ज्याझ्वः दबूया छ्याञ्जे लिसें ज्याझ्वः कजि राजु नापितं न्ह्याकूगु खः ।