पुरात्वात्विक सम्पदाया वास्तुकला ज्ञाता व डिजाइनर, वरिष्ठ चित्रकार, संगितज्ञ, भ्वाइलेन गुरू व नेवाः जाति, नेवाः सम्पदा, नेवाः तजिलजि व नेपालभाषायात माया याइम्ह हरि प्रसाद वैद्य मदुगु १३ न्हुया पूण्यतिथिइ बिचाः जुल ।
नेवाः ग्वहालि पुचः १३/१५ नेवाः मिसा ग्वहालि पुचः १३/१५ या मंकाः ग्वसालय् जूगु बिचाः मुँज्याय् वय्कःपाखें भ्वाइलिन सयेकूपिनिपाखें भ्वाइलिनया धुन न्ह्यब्वयाः बिचाः हायेकूगु खः ।
मदुम्ह वैद्ययात श्रद्धाञ्जली कथं जनकवि दुर्गालाल श्रेष्ठं च्वयादीगु चिनाखँ ज्याझ्वलय् वय्कःया हे सलय् न्यंकूगु खः ।
वय्कःया बिचाः मुँज्याय् नेवाः न्ह्यलुवालिसें पूर्वमन्त्री राजेन्द्रप्रसाद श्रेष्ठ, नेवाः न्ह्यलुवा डा. महेशमान श्रेष्ठ, वरिष्ठ चित्रकार किरण मानन्धरलिसेंया हनेबअहःपिनि ब्वति दुगु खः ।
९० दँय् दिवंगत जूम्ह वैद्यया छम्ह काय् दु ।
