नेवाः समुदाय दुनेया स्यस्यः समाज यलया १२ क्वःगु पलिस्था दिं थ्व हे चैत्र १४ गते शनिवाः यल दरबार लागाय् सांस्कृतिक बाजागाजालिसें देय् चाःहिलाः हनीगु जूगु दु ।
पलिस्था दिंया लसताय् नगर परिक्रमा, हना व सांस्कृतिक ज्याझ्वःत ग्वसाःग्वइगु जूगु दु । ‘झी स्यस्यः, झी नेवाः, झीगु तजिलजि’ मू नारा बिसें थ्व दिं हनेत्यंगु खः ।
सुथसिया ८ ताः इलय् यल दरबार लागा मंगलबजारं ¥याली न्ह्याइ । ‘दमोखिं नगडा बासुरी बाजं’या मौलिक ताललिसें ¥याली हौगः, तिच्छुगल्ली, इखालखु, बालुखा, पूर्णचण्डी, गाबहाः जुयाः वालिफलय् थ्यंकाः क्वचाइ । द्वलंद्वः मनूतय् ब्वति दइगु थ्व ज्याझ्वलय् स्यस्यः समुदायया जक मखसें सकल यलबासीया निंतिं नं छगू ऐतिहासिक दिं जुइ ।
मूल समारोह सुथसिया ११ः३० ताःइलय् अशोक पार्टी प्यालेस बालिफलय् जुइ ।
ज्याझ्वःया उलेज्या पूर्व प्रधान न्यायाधीश कल्याण श्रेष्ठं यानादी ।
ज्याझ्वलय् यल महानगरपालिकाया मेयर, उपमेयर, संघीय तथा प्रदेश सरकारया मन्त्री व सांसदत, प्रशासनिक व सुरक्षा निकायया प्रमुखत, लिसें थीथी खलःपुचःया प्रतिनिधिपिनिगु तकं ब्वति दइगु धाःगु दु । उगु लसताय् उत्कृष्ट स्यस्यः सम्मान, उत्कृष्ट इलाका पुरस्कार, यशस्कर सम्मान, आजीवन सदस्य सम्मान, उत्कृष्ट विद्यार्थी पुरस्कार लःल्हाइगु जूगु दु । समाजं भाषा, संस्कृति, शिक्षा व सामाजिक ख्यलय् योगदान बियादीपिं व्यक्तित्व व विद्यार्थीतय्त थ्व हना लःल्हायेत्यंगु खः ।
ज्याझ्वलय् ‘दमोखिं नगडा बासुरी बाजं’ न्ह्यब्वइगु जूगु दु । थ्व नेवाः समुदायया प्राचीन सांस्कृतिक धरोहर खः । छगू इलय् हरेक जात्रा, व थीथी भिं ज्याय् थाइगु थ्व बाजं आः लोप जुइगु अवस्थाय् थ्यंगु दु । स्यस्यः समाजं थुज्वःगु लोपोन्मुख बाजंत युवापुस्तायात स्यनाः संरक्षण यानावयाच्वंगु दु ।
समाजं सकल स्यस्यः समुदाय व शुभेच्छुकपिन्त उगु ऐतिहासिक लसताय् सक्रिय ब्वति कयाः ज्याझ्वः ताःलाकेत इनाप याःगु दु । समाजयाकथं यलया दुनेया बस्तीइ स्यस्यः जातिया ३० द्वः स्वयां अप्वः मतदाता दु ।
थुगुसी १२ क्वःगु पलिस्था दिवस समुदायया एकता, म्हसीका व सांस्कृतिक गौरवया प्रतीककथं ब्वलनीगु भलसा कयातःगु दु ।
