चीमिपिं व जेष्ठ नागरिकपिन्त निःशुल्क उपचार सेवा बियावयाच्वंगु छत्रपाटी निःशुल्क चिकित्सालय अस्पतालया ६९ क्वःगु बुसादँ थौं तःजिक हन ।
चिकित्सालयया नायः डा. मनोजमान श्रेष्ठया सभापतित्व व येँ मनपाया का.वा. मेयर सुनिता डंगोलया मूपाहाँसुइ जूगु ज्याझ्वलय् अस्पतालय् २५ दँ स्वयां अप्वः सेवा यानादीपिं ५ म्ह, २० दँ स्वयां अप्वः सेवा यानादीपिं ५ म्ह, १० दँ स्वयां अप्वः सेवा यानादीपिं ८ म्ह व ५ दँ स्वयां अप्वः सेवा यानादीम्ह छम्हेसित कदरपौ लःल्हासे हंगु खः ।
उगु ज्याझ्वलय् ३० दँ सेवा बियाः अवकास काःपिं डा. चन्द्र लक्ष्मी श्रेष्ठ व हेमा लामायात विशेष सम्मान याःगु खः ।
बुसादँया लसताय् सीतादेवी मानन्धरं १० लख व ज्ञानेन्द्र भक्त श्रेष्ठं ११ लख तकाया चेक चिकित्सालययात लःल्हाःगु खः ।
ज्याझ्वलय् नुगःखँ तयादिसें मूपाहाँ डंगोलं छत्रपाटी चिकित्सालय येँ महानगर दुने लाःगु बांलाःगु अस्पताल जूगु व थन येँ महानगरया जक मखसें नेपाःमिपिसं दंक उपचार सेवा कयाच्वंगुलिं येँ मनपां थुगु अस्पताललिसे न्हापाया कार्यकालनिसें हे सहकार्य यानावयागु खँ तयादिल । वय्कलं लिपा नं अस्पताल यात माःकथं ग्वाहालि यायेत थःपिं तयार दुगु खँ तयादिल ।
ज्याझ्वलय् अस्पतालया न्वकु कुमारदेव मानन्धर, छ्याञ्जे जगदीश मालीपिसं नुगःखँ तयादीगु खः ।