दँय्दसं मार्चया लिपांगु शनिवाः हनावयाच्वंगु हलिं नेवाः दिं थुगुसी थ्व हे ने.सं. ११४६ चाैलाथ्व दशमि (चैत्र १४) गते शनिवाः तःजिक हनीगु जूगु दु ।
थुगु दिं तःजिक हनेगु निंतिं प्रचारप्रसार यायेगु तातुनाः थाैं स्वयम्भू साइकल पुचःलिसेया सहकार्यय् स्वयम्भुं तारकेश्वर जुयाः गाेदावरीतक साइकल र्याली जूगु दु ।
येँ मनपाया कार्यबाहक प्रमुख सुनिता डंगाेलया मूपाहाँसुइ जूगु ज्याझ्वलय् येँ मनपा १५ वडाका नायः इश्वरमान डंगाेल, हलिं नेवाः दबूया केन्द्रीय न्वकू सुरेन्द्रभक्त श्रेष्ठ, केन्द्रीय मूछ्याञ्जे लालिमा श्रेष्ठ, केन्द्रीय दुजः अञ्जना ताम्राकारलिसें दबूया नेपाः देय् मूकवः नायः रमेशमान मुनिकारपिसं मंकाःकथं रिवन चानाः व गुक्वःगु हलिं नेवाः दिं च्वयातःगु बेलुन ब्वयेकाः उलेज्या यानादीगु खः ।
ज्याझ्वलय् नुगःखँ तयादिसें मूपाहाँ डंगाेलं हलिं नेवाः दिं हलिमय् न्यंकं च्वनाच्वंपिं सकल नेवाःतय् मंकाः न्हि जूगुलिं थुकियात उत्सवकथं हनेमाःगु खँ तयादिल ।
हलिं नेवाः दिंया लसताय् न्हापांगु ज्याझ्वःकथं साइकल र्यालीया ग्वसाः ग्वयागु खःसा अाः १०८ कुमारी पूजा ज्याझ्वःलिसें स्मारिका प्रकाशन, विशिष्ट व्यक्तित्व सम्मान व हलिं नेवाः दिं थुगुसी येँया बसन्तपुलिइ हनेज्या जुइगु नायः मुनिकारं कनादिल ।
सच्छिं मल्याक साइकल यात्रीतय् ब्वति दुगु साइकल र्याली स्वयम्भु भुइख्यलं न्ह्यानाः तारकेश्वरया धर्मस्थलीइ थ्यंकाः अन तारकेश्वर नगरपालिकापाखें लसकुस याःगु खःसा बज्रबाराही थ्यंकाः साइकल र्यालीयात गाेदावरी नगरपालिकां लसकुस यासें ज्यनाःया तकं व्यवस्था याःगु खः ।