राष्ट्रिय महिला आयोग व राष्ट्रिय दलित आयोगं इनिसा विकयात स्याःगुलिइ संलग्न दोषीतयत कडा कारबाही यायेत, पीडितयात न्याय बिइत व कानुन कार्यान्वयन याइगु निकाययात जवाफदेही यायेत सम्बन्धित फुक्क पक्षयात इनाप याःगु दु ।
निगुलिं आयोगं थौं मंकाः विज्ञप्ति पितब्वयाः घटनाया दोषीतयत कडा कारबाही यानाः पीडिततयत न्याय बिइत व पीडित छेँजःपिंत सुरक्षा व्यवस्था यानाः पायछिगु क्षतिपूर्ति उपलब्ध याकेत इनाप याःगु खः । उकिया लिसें आयोगं रौतहट व पर्सालिसें देयया थी थी थासय् मिस्त, दलित व मचाल्यासेपिंत जुयाच्वंगु हिंसा व विभेदया घटनाया नं गम्भीर छानबिन यायेमाःगुलिइ बः ब्यूगु खः ।
सुर्खेतया गुर्भाकोट नगरपालिका–६, बडाखोलीइ स्थायी छेँ जुयाः थौंकन्हय् वीरेन्द्रनगर–१ य् च्वनावयाच्वंम्ह १६ दँ दुम्ह इनिसा आइतबाः सुथय् वीरेन्द्रनगर–४, सहिद पार्क लिक्कया जनजागरण सामुदायिक वनय् बेहोस अवस्थाय् लुयावःगु खः । वयात प्रहरीं प्रदेश अस्पताल कालागाउँलय् यंकूगुलिइ चिकित्सकतयसं मदूगु घोषणा याःगु खः ।
मदुम्हेसिया थःथितिपिंसं सामूहिक बलात्कार जूगु धासें फागुन २५ गते जिल्ला प्रहरी ज्याकुथि सुर्खेतय् उजुरी ब्यूगु खः । प्रहरीतयगु न्हापांगु अनुसन्धानं इनिसा बलात्कारलिपा मदूगु खनेदूगु खः । उगु घटनाय् सुर्खेत प्रहरीं प्यम्हेसित ज्वने नं धुंकूगु खः । आयोगं मानव सभ्यतायात हे हाथ्या बिइकथं जूगु थ्व विभत्स घटनाप्रति दुःख नं प्वंकूगु खः ।