राष्ट्रिय समाचार समिति राससं गण्डकी प्रदेशया राजधानी पोखराय् ‘गण्डकी आमसञ्चार विकास व अनुसन्धान केन्द्र’ निर्माणया निंतिं कुतः न्ह्याकूगु दु ।
थौं राससया कार्यकारी अध्यक्ष धर्मेन्द्र झां उगु अनुसन्धान केन्द्र निर्माणसम्बन्धी प्रस्ताव गण्डकी प्रदेश सरकारया मुख्यमन्त्री सुरेन्द्रराज पाण्डेयात लःल्हानादिल ।
उगु झ्वलय् मुख्यमन्त्री पाण्डें आमसञ्चार विकास व अनुसन्धान केन्द निर्माण यायेगु राससया प्रस्तावप्रति प्रदेश सरकार सकारात्मक दूगु धयादिल ।
“आमसञ्चार ख्यःया विकासया निंतिं राससं न्ह्यःने हःगु योजना ईकथंया व महत्वपूर्ण जू”, मुख्यमन्त्री पाण्डें धयादिल, “राससं वःगु प्रस्तावयात थप अध्ययन यानाः आवश्यक निर्णयय् थ्यंके ।”
वय्कलं सत्यतथ्य, आधिकारिक व विश्वसनीय बुखँपाखें आम नागरिकतय्त सूसुचित याकावयाच्वंगु देय्या छगूजक समाचार समिति राससलिसे प्रदेश सरकारं सहकार्य व समन्वय याइ धयादिल ।
राससया कार्यकारी अध्यक्ष झां राससं थःगु सेवा तब्याकेगुलिसें प्रदेश सरकार व स्थानीय तहलिसे सहकार्यया नीति काःगु धयादिल । पोखरा महानगरपालिका–९ नयाँ बजारय् च्वंगु राससया गण्डकी प्रदेश ज्याकुथि दूगु थासय् आमसञ्चार विकास व अनुसन्धान केन्द्र निर्माण यायेत आर्थिकलिसें आवश्यक ग्वाहालिया निंतिं प्रदेश सरकारयात प्रस्ताव न्ह्यःब्वयागु वय्कःया धापू दु ।
कार्यकारी अध्यक्ष झां राससया प्रस्तावय् प्रदेश सरकारया सकारात्मक दृष्टि दइगु विश्वास प्वंकादिल । “प्रदेश सरकारं बहुवर्षीय योजनाअन्तर्गत आमसञ्चार विकास लिसें अनुसन्धान केन्द्र निर्माणया निंतिं आर्थिक स्रोत व्यवस्थापन यायेमा धइगु राससया माग व अपेक्षा दु”, कार्यकारी अध्यक्ष झां धयादिल, “प्रदेश संरचनाय् वनेधुंकूगु राससया सेवा तब्याकेगुलिइ व स्तरोन्नतिइ प्रदेश सरकारं नं अपनत्व कायेमाः ।”
गण्डकी प्रदेशदुनेया बुखँ, किपाः, श्रव्य व श्रव्यदृश्य सामग्री प्राथमिकताया आधारय् सम्प्रेषण यायेगु विषयय् प्रदेश सरकारलिसे सहकार्य जुयाच्वंगु वय्कलं कनादिल । “गण्डकी प्रदेश सरकारया ज्याखँ, नीति व योजनाबारे बुखँ सम्प्रेषण यानाः आम नागरिकतक थ्यंकेत राससं प्रदेश सरकारलिसे सहकार्य यानावयाच्वंगु दु”, कार्यकारी अध्यक्ष झां धयादिल, “वइगु इलय् प्रदेश सरकारलिसेया सहकार्य व समन्वययात अझ सुदृढ यायेत रासस तयार दु ।”
नयाँ बजारय् च्वंगु राससया थःगु हे जग्गाय् उगु केन्द्र निर्माणया निंतिं विस्तृत परियोजना प्रतिवेदन (डिपिआर) नं तयार जुइधुंकूगु खः । थ्यंमथ्यं स्वगू रोपनी क्षेत्रफलया उगु जग्गाय् भूमिगत पार्किङलिसेंया व्यावसायिक भवन दयेकेगु राससया योजना खः । ‘गण्डकी आमसञ्चार विकास व अनुसन्धान केन्द्र’ च्वनीगु उगु भवनय् सुविधांजाःगु ज्याकुथि, सभाकक्ष, रेडियो, टेलिभिजन स्टुडियो, खाजाघर, भोजनालयलिसें संरचना दयेकीगु धाःगु खः । प्रदेश सरकारलिसेया साझेदारीइ दयेकीगु उगु केन्द्रपाखें नागरिकतय्गु सूचनाया हक सुनिश्चित यायेत, सङ्घ, प्रदेश व स्थानीय तहया निर्णय सहज रुपं काये फयेकेत, डिजिटल प्रविधिइ आधारित पत्रकारिताया विकास व पत्रकारतय्गु दक्षता अभिवृद्धिइ तिबः बिइगु राससं विश्वास कयाच्वंगु खः ।
प्रदेशस्तरय् डिजिटल साक्षरता व पारदर्शी प्रशासनयात सुशासन कायम यायेत ग्वाहालि याइगु अपेक्षा कयातःगु खः । मुख्यमन्त्री पाण्डेलिसे नापे लायेगु झ्वलय् कार्यकारी अध्यक्ष झालिसें, रासस गण्डकी प्रदेश ज्याकुथिया प्रमुख वासुदेव पौडेललिसेंपिनिगु सहभागिता दूगु खः ।