सरकारं २०६२/६३ सालंनिसें २०८२/८३ तक सार्वजनिक पदय् च्वंपिं प्रमुख राजनीतिक पदाधिकारी लिसें उच्च पदस्थ कर्मचारीपिनिगु सम्पत्ति विवरण सङ्कलन लिसें छानबिन यायेत सम्पत्ति, जाँचबुझ/छानबिन आयोग गठन याःगु दु ।
प्रधानमन्त्री लिसें मन्त्रिपरिषद्या ज्याकुथिइ थौं च्वंगु मन्त्रिपरिषद्या बैठकं सर्वोच्च अदालतया पूर्वन्यायाधीश राजेन्द्रकुमार भण्डारीया संयोजकत्वय् प्यम्ह दुजः दुगु आयोग गठन याःगु खः ।
आयोगया दुजःपिं पूर्वन्यायाधीशत चण्डीराज ढकाल, पुरुषोत्तम पराजुली, पूर्व प्रहरी नायब महानिरीक्षक गणेश केसी व चार्टर्ड एकाउन्टेन्ट प्रकाश लम्साल खः ।
प्रधानमन्त्री वालेन्द्र शाहया नेतृत्वय् सरकार गठन जुइधुंकाः सरकारं वंगु चैत १३ गते १५ न्हुदुने समिति गठन यायेगु निर्णय याःगु खः । सरकारं सार्वजनिक याःगु शासकीय सुधारसम्बन्धी १०० गू कार्यसूचीया ४३ गूगु बुदाँय् थुकियाबारे न्ह्यथनातःगु खः ।
उगु बुँदाय् देशय् दयाच्वंगु भ्रष्टाचार, सम्पत्ति सुचुकेगु लिसें दण्डहीनतायात अन्त्य यायेत प्रधानमन्त्री लिसें मन्त्रिपरिषद्या ज्याकुथिअन्र्तगत दइकथं १५ न्हुदुने अधिकारंजाःगु सम्पत्ति छानबिन समिति गठन यायेगु न्ह्यथनातःगु खः ।
. छानबिन प्रक्रियायात कानूनी मापदण्ड, दसिइ आधारित लिसें निष्पक्ष रूपं सञ्चालन यायेगु लिसें आयोगं पेस याःगु प्रतिवेदन लिसें सिफारिसत सम्बन्धित निकायपाखें कार्यान्वयन यायेगु व्यवस्था दयेकेगु न्ह्यथनातःगु खः ।