मदनकृष्ण श्रेष्ठया जीवनीइ सकिपा ‘मदनकृष्ण’ दयेकीगु

 ख्याली जुजु मदनकृष्ण श्रेष्ठया जीवनीयात कयाः संकिपा ‘मदनकृष्ण’ दयेकीगु जूगु दु । सोमबाः येँय् पत्रकार सम्मेलन यानाः निर्देशक मिलन चाम्सं संकिपा दयेकेत्यंगु जानकारी बियादिल । थ्वसिबें न्ह्यः ‘बबी’, ‘ब्लाइन्ड रक्स’ व ‘अञ्जिला’ थें जाःगु सुथांलाक्क ‘बायोपिक’ संकिपा निर्देशन यानादी धुंकूम्ह निर्देशक चाम्सं थुकिं थःतः ह्वःताःया लिसें हाथ्यात नापं ब्यूगु धयादिल । “थुगु संकिपा निर्देशन यायेदयाः जि तसकं लय्ताना च्वनागु दु, लोकंह्वाःम्ह कलाकारया जीवनीयात धकिंमय् हयेखंगु हे जिगु निंतिं तःधंगु ह्वःताः खः । वय्कःया जीवनीयात धकिंमय् हयेगु तयारी जुयाच्वंबले वय्कःया बारेय् यक्वः हे खँ त सिइकेदत, वय्कःया जीवनी संकिपा सिबें म्हो मजू”, निर्देशक चाम्सं धयादिल । प्याखंम्वः मदनकृष्ण श्रेष्ठं थःगु जीवनीयात संकिपाया धकिंमय् हयेगु तयारी यानाच्वनादीपिं निर्माण समूहयात सुभाय् देछानादिल । “जिं थःम्हेस्यां  ज्या याना च्वनागु दु, उसाँय् नं साथ ब्यूतक शरीरयात जबर्जस्ती जूसां ज्याय् छ्यला च्वनागु दु । जिगु जीवनीयात संकिपाया कथं हयेगु आँत यानादीपिं सकलें पुचःयात सुभाय् । लिसें, थुगु यात्राय् ‘म’ नापनापं ‘ह’ अथे धइगु हरिवंशया नापं उत्तिकं साथ व भूमिका दु । जिगु जिवन वय्कः मदयेकं प्वनाच्वंगु दु । अथे जुयाः जिगु लिउलिउ हरिवंशया नापं जीवनी धकिंमय् हयेगु धाःगुलिं जिं जिगु बारेय् संकिपा दयेकेत सहमति बियागु खः”, ख्यालि जुजु श्रेष्ठं धयादिल । प्याखंम्वः श्रेष्ठं संकिपाय् थःगु भूमिका म्हितादीत्यंम्ह कलाकार महेश त्रिपाठीया ज्याया चर्चा यानादिसें ल्वःम्ह प्याखंम्वः ल्यःगु धयादिल । “जिगु व महेशजीया पुलांगु किपा स्वयेगु खःसा यक्वः हे ज्वःलाः, अभिनय ला वय्कःया च्वछायेबहः जू हे जू । संकिपा बांलाइ धइगु जिं तायेका च्वनागु दु”, ख्यालि जुजुं धयादिल । प्याखंम्वः हरिवंश आचार्यं ख्यालि जुजु श्रेष्ठया जीवनी संकिपाया निंतिं पाय्छि जूगुलिं स्वकुमिपिंसं पियाच्वनीगु विश्वास प्वंकादिल । वय्कलं ‘मह जोडी’ जुयाः थःपिंसं यानागु ज्या व मंकाः ज्याया नापनापं प्याखंम्वः श्रेष्ठया जीवनया थतक्वतयात कलात्मक कथं संकिपाय् खने दइगु धयादिल । “गुलिखय् प्याखंम्वःया नां चिधं जुइ, गुलिसिया तःधं जुइ । अथे जुइवं सकसिया जीवनीयात कयाः संकिपा दयेका मज्यू, छाये धाःसा जीवनीया निंतिं माःगु लस्सा दइमखु । मदन दाईया जीवनीयात जिं गुलि थुइकागु दु, वय्कःया थतक्वतं स्वकुमिपिंत मनोरञ्जनया नापनापं छगू कथंया शिक्षा नापं बिइ धइगु जिं तायेकागु दु । गूगु पुचलं संकिपा दयेकेगु तयारी यानादीगु दु, थुकियात खनाः जि तसकं आशावादी जुयागु दु”, प्याखंम्वः आचार्यं धयादिल । ख्यालि जुजु श्रेष्ठयात थःगु हामाया कथं तायेकाः वयाच्वनागु व मंकाः ज्याया पीखुदँ पूवने धुंकूगु प्याखंम्वः आचार्यं धयादिल । उगु संकिपाय् ख्यालि जुजु लिसें मह सञ्चार लिसें स्वानादीपिं किरण केसी, राजाराम पौडेल, गौरीशङ्कर धुजु, नरेन्द्र कंशाकारया नापं मंकाः ज्या जुइगु जूगु दु । अथे हे, यम थापाया च्वसुइ तयार जुइगु उगु संकिपाय् प्याखंम्वः केकी अधिकारी, यमन श्रेष्ठ, रुषा न्यौपाने, देशभक्त खनाललिसेंया प्याखंम्वःया अभिनय दइगु दु । ज्याझ्वलय् चलचित्र विकास बोर्डया नायः दिनेश डिसी, म्ये हालामि आनी छोइङ डोल्मा, म्ये हालामि प्रेमराजा महत, निर्देशक लक्ष्मण सुवेदी, सुदन केसीलिसेंया ब्वति दूगु खः । उगु संकिपाया छायाङ्कन भदौ निसें न्ह्याइगु ज्याझ्वलय् जानकारी ब्यूगु दु ।