येँ महानगरपालिका १९ वडाय् लाःगु यतखा बहाः वनेथाय् मतया तार सर्ट जुयाः मिँ च्याःगु दु ।
सोमवाः सुथय् ११ः४५ ता इलय् मतया पोलय् मिँ च्याःगु खःसा थथे च्याःगु मिँ नापं च्वंगु छेँय् लानाः मिँ नःगु खः । मिँ च्यानाः छेँया कोथाय् गोदाम यानातःगु सकतां हलंज्वलं च्यानाः नष्ट जूगु दु । नापं लिक लिक च्वंगु तारा प्वाय् दुगु थासय् नं मुगु खनेदु ।
मिँ च्यायेवं जःलाखलापिन्सं जुद्ध वारुण यन्त्र बसन्तपुरय् फोन याःगु खः । ११ः४५ ता इलय् च्याःगु मिँ थ्यंमथ्यं झिंन्यागू मिनेटया दुने नियन्त्रणय् काःगु खःसा यतखाया मू लँपुया छेँय् मिँ च्याःगुलिं न्हिनय् २ ता ईतक उगु लँपुइ वयेवनेगु बन्द जूगु खः ।
तार च्याःगु हुनिं विद्युत प्राधिकरणया कर्मचारीपिन्सं आः थथे च्याःगु तार व उगु लागाय् मेगु पोलय् नं मिँ च्यायेफूगु सम्भावनायात ध्यानय् तयाः तार लिकायेगु ज्या जुयाच्वंगु दु ।
तारया कारणं यानाः थथे धनजनया क्षति जुगु सुनां भर्ना विइ धैगु जनतायाके न्ह्यस ब्वलंगु । आशा याय् सरकारं थजागु क्षति यात सरकारी कोष हे व्यवस्था याइ ।