विज्ञतय्सं नेपालय् मिखा उपचारया सेवाया पहुँच तब्यानावंसां मिखा कांया जोखिम अझं दनिगु धाःगु दु । नेपाल नेत्रज्योति सङ्घं ग्वसाः ग्वःगु ३०क्वःगु केन्द्रीय सभाया अधिवेशनय् मिखा कां जुइगु ल्याः म्हो जुसां अझं जोखिम दनिगु वय्कःपिनि धापू दूगु खः ।औसत आयु, रक्तचाप लिसें मधुमेहया बिरामी अप्वयावंगुलिं नेपालय् मिखाया बिरामी अप्वयावंगु न्ह्यथसें वय्कःपिंसं ग्रामीण क्षेत्रय् मिखा उपचार सेवाया पहुँच तब्याकेत बः बियादिल ।
नेपाःया मिखा उपचार सेवा हलिमय् हे बांलागु धासें सभाय् ब्वति कयादीपिंसं नेपाःयात मिखा उपचारया ‘हव’ दयेकेफइगु खँ कुलादिल ।सङ्घअन्तर्गत आः अस्पताल, उपचार केन्द्र लिसें थीथी पिनेया ज्याझ्वःत पाखें सन् २०२५ य् ३३ लख ७८ द्वः व ४२ म्हेसियां परीक्षण याकूगु खःसा निगू लख ६६ द्वः व ४०१ म्हेसिया शल्यक्रिया याःगु खः ।
सभा न्ह्याकादिसें कोशी प्रदेशसभाया उपसभामुख सिर्जना दनुवारं स्वंगू तगिंया सरकारं मिखा उपचार सेवाया निंतिं पत्यायानातःगु व विश्वास त्याकेत ताःलाःगु संस्थाया कथं नेपाल नेत्रज्योति सङ्घ दूगु धासें कन्हय्या दिनय् संस्थां ग्रामीण विपन्न जनतायातमिखा उपचार सेवातक पहुँचय् हयेत थप ज्या यायेत इनाप यानादिल । वय्कलं धयादिल, “स्वंगू तगिंया सरकारं मिखा उपचार सेवाया निंतिं लाय् अप्वयेकेमाः । थुकिया निंतिं सङ्घं नं थःगु क्षमता तब्याकायंकेमाः ।”
वय्कःया कथं वंगु आदँय् प्रदेश सरकारं सङ्घअन्तर्गत सञ्चालित अस्पताल लिसें उपचार केन्द्र नापं थीथी पिनेया ज्याझ्वःयात नीन्यागू लख तका ज्वःया सामग्री लःल्हाःगु खः ।रेसुङ्गा नगपालिकाया प्रमुख खिलध्वज पन्थींमिखा उपचार सेवाय् नगरपालिकां न्हापांगु प्राथमिकता बियागु जानकारी बियादिसें आर्थिक अभावया हुनिं मोतियाविन्दुलिसेंया मेमेगु उपचार सेवाया अभाव जुइके मबियागु धयादिल ।
प्रा डा देवनारायण साहं नेपालय्मिखा उपचारया सेवाया पहुँच अप्वःसां मिखाकांया जोखिम अझं न्यंनाच्वंगु दनिगु धयादिल ।सङ्घया नायः प्रा डा चेतराज पन्तया सभापतित्वय् सम्पन्न ज्याझ्वलय् महासचिव भरतबहादुर चन्दं वार्षिक प्रतिवेदन न्ह्यब्वयादीगु खः । संस्थागत महासचिव प्रा डा पोखरेल सम्मानित ज्याझ्वलय् सङ्घया संस्थापक महासचिव प्रा डा रामप्रसाद पोखरेलयात ‘डा नन्द श्रेष्ठ अम्बिका श्रेष्ठ’ नेत्रज्योति सामाजिक हना याःगु खः ।
नेपालय् मिखा उपचारया संस्थागत प्रादुर्भाव, उन्नयन व विकासय् ज्वःमलागु योगदान यानादीगुलिं वय्कःयात हंगु खः ।उगु ज्याझ्वलय् नेत्रज्योति विशिष्ट सम्मान रेसुङ्गा व गोरखा नगरपालिका, प्रा डा देवनारायण साह, प्रा डा रघुनन्दन व्याँजु, लायन्स क्बल इन्टरनेसनल मल्टिपल काउन्सिल ३२५, सञ्जय खेतान, कृष्णहरि सापकोटा, जापानी नागरिकद्वय प्रा डा ताकेसी नाइतो व डा जुनसुके अकुरायात लःल्हाःगु खः ।
अथे हे, लाइफटाइम एचिभमेन्ट अवार्डपाखें श्यामकुमार पोखरेल, चक्रबहादुर सिंह, श्यामसुन्दर उदास, पदमनारायण चौधरी, प्रा डा दिलबहादुर क्षेत्री, वामदेव खनाल, नेत्रमणि लामिछाने व मायादेवी बज्राचार्ययात हंगु दु ।
नेत्रज्योति उत्कृष्ट जिल्ला शाखाया कथं सङ्खुवासभा, नेत्रज्योति उत्कृष्ट मिखा अस्पताल सम्मानपाखें विराटनगर मिखा अस्पताल, नेत्रज्योति उत्कृष्ट मिखा उपचार केन्द्र सम्मानपाखें कालीगण्डकी मिखा उपचार केन्द्र व नेत्रज्योति डा निकोल ग्रासेट सम्मानपाखें डा पुष्पा गिरीयात हंगु दु ।
ज्याझ्वलय् नेत्रज्योति सम्मान विन्दुसागर राजभण्डारी, शैलेन्द्रमान सिंह, कुमार पृथु, शालिकराम गौतम, मीना राई व देवबहादुर बुढाक्षेत्रीयात हन । (रासस)
