नेवाः भासं सकतां बुखँ
कामपा १८ वडाया ग्वसालय् असार १३ व १४ गते निन्हु सास्कृतिक ज्याझ्वः जुइत्यंगु दु । नेपाया कला संस्तृतियात हस्तारण व पुस्तारण याय्गु तातुना १८ वडाय् च्वंगु त्वाःसंघ संस्था पाखें न्ह्यब्वत्यंगु सांस्कृतिक ब्वजयायात प्राथमिकता विइगु थ्व ज्याझ्वःया मू तातुना जुगु वडा अध्यक्ष न्हुच्छेकाजी महर्जनं जानकारी विउगुदु ।
थ्वहे ज्याझ्वःलय् थिथि संस्थापाखें नसाज्वलं व हलंज्वलंया स्टल नं ब्वइगु धागु दु । १८ वडा बासि व सकलसित थुगु ज्याझ्वलय् ब्वति काय्त अध्यक्ष महर्जनं आह्वान यागु दु ।
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं पूर्व केन्द्रीय दुजः जुयादी ।