नेपालभाषाया संकिपा व संगीतख्यलय् बिस्कं म्हसिका न्ह्यब्वया वया च्वंगु मगन ईन्टरनेटमेंटया कुतलय् असार २७ गते शनिवाः हाकनं छपु न्हूगु म्ये “तँचाये मते न्हां” या म्युजिक भिडियो पितब्वज्या जूगु दु ।
कीर्तिपुर सिनेप्लेक्सय् बोसिगां पुचःया ग्वसालय् जूगु ज्याझ्वःया दथुइ म्येया पितब्वज्या जूगु खः । ज्याझ्वलय् चन्द्रागिरि नगरपालिकाया मेयर घनश्याम गिरी मूपाहाँ कथं झायादीगु खः । मूपाहाँ गिरीं चन्द्रागिरि नगरपालिका धइगु संस्कृति व संस्कारया धनी नगर खः धासें तँचाये मते न्हां म्येया शुटिंगय् नेवाः लजगा व तजिलजि क्यनेत नगरपालिकापाखें फुगुचागु ग्वाहालि यानागु खँ कनादिल । थथे तजिलजि न्ह्यब्वयेगुलिइ नगरपालिका सदां न्ह्यचिलेगु वचं बियादिल।
लसकुस न्वचु रचनाकार व संगीतकार रकि महर्जनं तयादिलसा नेपालभाषाया न्हापांम्ह म्युजिक भिडियो निर्देशक विजयरत्न असंबरें ल्याय्म्ह पुस्ता छ्यला नेवाः परम्परा कथं लजगायात पर्दाय् हःगु धइगु हे थ्व म्युजिक भिडियोया विशेषता खः धका धयादिल ।
ज्याझ्वलय् चन्द्रागिरी नगरपालिका वडा १०या वडाध्यक्ष शिवकुमार महर्जन, सभानायः रामकृष्ण महर्जन लगायत मनोज महर्जन, राज साय्मि व नीतेश तण्डुकारपिन्सं नुगः खँ तयादिल । थ्व भिडियोया निर्देशक, सम्पादक, किपालुमि रजिन महर्जन खःसा हुलाप्याखं सृष्टि महर्जन व दिया शाक्य खः ।
म्येसंकिपाय् मनोज महर्जन व सृष्टि महर्जनया मूभुमिका दुसा नितेश तण्डुकारलिसें आपालं कलाकारपिन्सं अभिनय यानादीगु दु । ज्याझ्वलय् म्येसंकिपाया कलाकार व प्राविधिक नापनापं ग्वाहालिमिपिन्त मतिनाया चिं देछाना हंगु खः ।
