स्वक्वःगु अन्तर्राष्ट्रिय नेपाली फिल्म अवार्ड (ईन्फा) २०२६ अन्तर्गत थीथी २१ प्रतिस्पर्धात्मक विधाया उत्कृष्ट पाँच मनोनयन पिदंगु दु ।
मनोनयन पिथनालिसें मनोनयनय् लाःपिं कलाकार, निर्माता, निर्देशक, च्वमि व प्राविधिकपिन्त दसिपौ नं लःल्हाःगु दु । इन्फा इभेन्ट्स यूके व इन्फा नेपालया मंकाः ग्वसालय् येँया होटल याक एन्ड यतीइ जूगु ज्याझ्वलय् वइगु साउन ३० गते (अगस्ट १५) उगु हे होटलय् जुइगु ईन्फा अवार्डया तयारीबारे जानकारी ब्यूगु खः ।
ग्वसाःखलःयाकथं २०८२ साल वैशाख १ गतेनिसें चैत मसान्ततक क्यंगु ४० स्वयां अप्वः नेपाली संकिपा मध्ये वरिष्ठ अभिनेता हरिहर शर्मा, वरिष्ठ अभिनेत्री गौरी मल्ल, वरिष्ठ निर्देशक व कलाकार रमेश बुढाथोकी व वरिष्ठ सम्पादक लिसें गीतकार करुण थापाया निर्णायक मण्डलं याःगु मूल्याङ्कनया लिधंसाय् उत्कृष्ट पाँच मनोनयन ल्यःगु खः । थुगुसी उत्कृष्ट संकिपा विधाय् ‘आ बाट आमा’, ‘ऊनको स्विटर’, ‘कोशेढुंगा’, ‘जेरी अन टप’ व ‘परान’ मनोनयनय् लाःगु दु ।
उत्कृष्ट अभिनेता विधाय् अनमोल केसी, नाजिर हुसेन, पल शाह व विपिन कार्की अले उत्कृष्ट अभिनेत्रीपाखे आना शर्मा, जसिता गुरुङ, मिरुना मगर, रिश्मा गुरुङ व सुरक्षा पन्त मनोनयनय् लाःगु दु ।
ग्वसाः खलकं प्रतिस्पर्धात्मक विधाबाहेक पब्लिक च्वाइस, जुरी, प्रोत्साहन, पर्फर्मर अफ दि अवार्ड, कमेडी अफ दि इयर व लाइफटाइम अचिभमेन्टलिसें मुक्कं ३२ विधाय् अवार्ड लःल्हाय्गु धाःगु दु ।
थुगुसीया लाइफटाइम अचिभमेन्ट अवार्ड वरिष्ठ हास्यव्यङ्ग्य कलाकार मदनकृष्ण श्रेष्ठयात नगद १ लख ११ द्वः १११ तकालिसें लःल्हाइगु जूगु दु । ईन्फा अवार्डया न्हापांगु व निगूगु संस्करण सन् २०२४ व २०२५ स बेलायतया लन्डनय् जूगु खः । स्वंगूगु संस्करण धाःसा न्हापांखुसीइ नेपालय् जुइत्यंगु खः ।
