नेपालभाषाया न्हूगु म्यूजिक भिडियो “ए हायन्सम् दाजु” बिहिवाः यलया खोनाय् छगू ज्याझ्वः यासें पितब्वज्या जूगु दु ।
यलया वडा २२ या वडाध्यक्ष सागर तुलाधर मूपाहाँ कथं झायादीगु उगु पितब्वज्या ज्याझ्वः नन्दमान महर्जनया सभानायसुइ जूगु खः ।
ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरे, नेपाः टिभि या कार्यकारी निर्देशक रामकृष्ण खडगी , चलचित्र विकास बोर्डया पूर्व सदस्य राजेन्द्र के सि , झीगु सः सिजन २ या कार्यकारी निर्माता राजु राजदेब बज्राचार्य लगायतया विशेेष उपस्थिति दूगु खः ।
निरञ्जन महर्जनं लय् चिनादीगु थ्व म्ये वयकलं हे च्वयादीगु खः ।
राजेन्द्र महर्जन व संगीता श्रेष्ठ महर्जनपिनिगु सः दुथ्याःगु थुगु “ए हायन्सम् दाजु” म्यूजिक भिडियोया निर्देशक गौतम तण्डुकार खःसा सह निर्देशक अनिल नकःमि खः ।
ईलियस महर्जन, निशा डंगोल, रेमिका डंगोल, सुविना शाही, ऐन्जी तामाङ, नन्दमान महर्जन, विविन्द्र डंगोल, तुल्सी माया डंगोलपिनिगु अभिनय दुथ्याःगु थुगु म्यूजिक भिडियोय् सलिना पाण्डे व रमी बज्राचार्यं समाःया भाला कुबियादीगु दुसा गिफ्ट नेपाल व विनाज ड्रेस हायर सेन्टर एण्ड बुटिकपाखें वसःया व्यवस्थापन यानातःगु दु ।
चन्द्रमान महर्जनया निर्माणय् पिदंगु थुगु म्यूजिक भिडियोया छायाँकन रवि महर्जनं यानादीगु दुसा सम्पादन गौतम तण्डुकार व अनिल नकःमिं यानादीगु खः ।
पितब्वज्या ज्याझ्वलय् म्येहालामि राजेन्द्र महर्जन व संगीता श्रेष्ठ महर्जन , निर्देशक व सम्पादक गौतम तण्डुकार लगायत विशेष पाहाँ व मूपाहाँ पिन्सं नुगःखँ तयादीगु खः ।
अथेहेतुं विजयरत्न असंबरे पाखें थ्व भिडियोया समीक्षात्मक टिप्पणी तयादीगु खः ।
म्यूजिक भिडियाे स्वयेत क्लिक यानादिसँ ।