प्रतिनिधिसभाया उपसभामुख पदय् श्रम संस्कृति पार्टीया रुबीकुमारी ठाकुर निर्वाचित जुयादीगु दु ।
सभाया थौंया बैठकय् प्रस्तावक व समर्थकतय्गु सहलहलिपा जूगु मतदानय् ठाकुर तसकं अप्वः मतलिसें निर्वाचित जुयादीगु सभामुख डोलप्रसाद अर्यालं घोषणा यानादिल ।
मतदानय् ठाकुरया पक्षय् निसः व २९ व प्रतिस्पर्धी राष्ट्रिय प्रजातन्त्र पार्टी (राप्रपा) या सरस्वती लामाया पक्षय् न्यागू मत कुतुंवंगु खः ।
सुं नं उम्मेदवारयात मत बिइमखु धइगुलिइ २२ मत कुतुंवंगु खः ।
थौंकन्हय् प्रतिनिधिसभाय् निसः व ७५ म्ह दुजः जूगुलिइ मतदानय् निसः व ५६ म्ह सांसदतय्सं ब्वति कयादीगु खः ।
थ्व हे दथुइ, सभामुख अर्यालं त्याःम्ह ठाकुरयात बधाई बियादिल । त्याःम्ह २६ दँ दुम्ह ठाकुरयात राष्ट्रिय स्वतन्त्र पार्टी (रास्वपा)लिसें नेपाली कांग्रेस, नेपाल कम्युनिष्ट पार्टी (एमाले) व नेपाली कम्युनिष्ट पार्टी (नेकपां) मत ब्यूगु खः ।
थौं हे बहनीसिया १२ः०० ताःइलंनिसें प्रतिनिधिसभाया न्हापांगु अधिवेशन क्वचाइ ।