विश्व संगीत दिवसया लसताय् येँया कमलादीइ च्वंगु प्रज्ञा प्रतिष्ठानय् राष्ट्रिय थारु कलाकारपिन्सं मौलिक म्येलिसें न्ह्यइपुसेच्वंगु प्याखं न्ह्यब्वःगु दु ।
राष्ट्रिय थारु कलाकार दबूया ग्वसालय् जूगु तःजिगु राष्ट्रिय थारु सांस्कृतिक ज्याझ्वलय् कलाकारपिसं थःथःगु थाय्या विशेष प्याखंत न्ह्यब्वःगु खः ।
ज्याझ्वःया उलेज्या मूपाहां नागरिक उन्मुक्ति पार्टीया संरक्षक व पूर्व सांसद रेशम चौधरीं यानादीगु खः ।
ज्याझ्वलय् नागरिक उन्मुक्ति पार्टीया संरक्षक रेशम चौधरीं थःगु म्हसीकाया नितिं सांस्कृतिक क्रान्तिया इलय् जेलय् च्वनेमाःगु दाबी यानादिल ।
वय्कलं धयादी, ‘जिं रेडियो नेपालय् २०४९ सालनिसें म्ये हालाः सांस्कृतिक क्रान्ति न्ह्याकागु खः । गुबले गणतन्त्र वल, उमिसं थारुया काय् नं म्येया माध्यमं म्हसीका मालाच्वंगु स्वये मफुत । जितः कुनाबिल । अले राजनीतिइ जि बाध्य जुयाः वये माल ।’
देय्न्यंकंया थारु कलाकारपिन्सं थःगु भाषा, संस्कृति व परम्परागत संस्कृति न्ह्यब्वइगु प्रस्तुति बिउगु राष्ट्रिय थारु कलाकार संघया महासचिव विजय चौधरीं कनादीगु दु ।
वय्कःया कथं देय्न्यंकंया वीर चौधरी, ममता चौधरी, विवेक चौधरी, खेम चौधरी, मनोज महतो, सुनील चौधरी, आर्या चौधरी, नन्दुराज चौधरी, शिव चौधरीया पुचलं हुलाप्याखं, सोमती थारुलिसें देय्न्यंकया राष्ट्रिय कलाकारपिसं थःथःगु लागाय् न्ववाइगु थारू भाय्या मौलिक सस्कृति न्ह्यब्वइगु न्ह्यब्वया न्ह्यब्वःगु खः ।
ज्याझ्वलय् प्यम्ह न्ह्यलुवा स्रष्टापिन्त हंगु खः ।