जीवन छगू यात्रा खः धाइ । थ्व निरन्तर यात्राय् झीसं आकस्मिक रुपं गुलि मनूतलिसे स्वापू तयेगु, भविष्यय् गज्याःगु घटनात नाप लायेगु धइगु मस्यू । अय्नं झी मनूतय्के मंकाः अनुभव दु । छम्हसिया जीवनय् जुइगु घटना मेम्हसिया अनुभवलिसे ज्वःलायेफु । छगूया अनुभवं मेगुया मर्म थुइकेगु क्षमता बी । व समानतां झीगु थःथवय् सत्तीगु स्वापू अप्वयेकी । गुकिया माध्यमं विकास जूगु स्वापू झीगु निंतिं दकलय् तःधंगु द्वहलपा जुइफु । म्वायेगुया तिबःया नापनापं थज्याःगु स्वापू म्वायेगु आशाया स्रोत नं खः । उकिं जिपिं न्ह्याबलें इमिगु ऋणी जुयाच्वना ।
थ्व बाखं खः, यात्राया झ्वलय् मेट्रो स्टेशनय् न्हापांखुसी नाप लाःपिं निम्ह म्हमस्यूपिं मनूतय् दथुइ अप्वयाच्वंगु मित्रता । बाखं न्ह्याःवंलिसे इमि दथुइ स्वापू तच्वया वनी । सकसिनं थःथःगु विगत, पारिवारिक गतिविधि व रुचिया बारे मेम्हसित खुल्ला रुपं कनेत सक्षम जुइ ।
६ दँया उमेरय् रेलं यात्रा यानाच्वंगु इलय् अबुम्हं छुं ईया निंतिं याकःचा त्वःताः वंबलय् इरावतीं गुगु ग्याःचिकु ब्वलंकूगु खः, व ग्याःचिकुं वया मनय् थाय् काःगु दु ।
मचाबलय् भोगेयाःगु ग्याःचिकुं वयात मेट्रों यात्रा याक्व पतिकं ग्याकाबी । उकिं वं फचिं फत्तले अज्याःगु यात्रापाखें बचे जुइगु कुतः याइ । तर गर्भवती भौया स्वास्थ्य अवस्था गम्भीर जूगु सीवं वं हैदराबाद भ्रमणया योजना दयेकेमाली । वया भाःतं थःगु व्यस्तताया हवाला बियाः वयात मेट्रों यात्रा यायेत सुझाव बी । मेगु विकल्प मदयेक, ग्याःचिकुयात त्याकाः व मेट्रो स्टेशनय् वनी । तर वया दुने ब्वलंगु ग्याःचिकुं हिंसात्मक रुप काइ अले वया साहसयात त्वाःथली । व अन असहाय जुल । व चःतिं त्वपुया कुतुं वनेत्यंबलय् छम्ह मनुखं वयात ग्वाहालि यायेत वइ । थुकथं हे प्रितम व इरावती न्हापांखुसी नापलात ।