संस्कार, संस्कृति, परम्परा, सामाजिक जीवन व सम्बन्धित पूर्वाधारया प्राचीनता पुनःस्थापना यायेगु योजनायात प्राथमिकता बियाः हाँडीगाउँया विकास न्ह्यःने वनाच्वंगु धासें येँ महानगर वडा ल्याः ५ या अध्यक्ष वीरेन्द्र प्रजापतिं नरदे (हाँडीगाउँ) या गुरुयोजना व स्थानीयबासीया चाहनाकथं ज्याझ्वःयात प्राथमिकताय् तयागु जानकारी ब्यूगु दु । चालू आर्थिक दँया सार्वजनिक सुनुवाई व थौं क्वचाःगु वइगु आर्थिक दँया योजनाबारे सहलह ज्याझ्वलय् वय्कलं थथे बिचाः प्वंकादीगु खः ।
‘हाँडीगाउँया सांस्कृतिक पर्यटनया प्रवद्र्धन व व्यवस्थापनया गुरुयोजना अन्तिम चरणय् थ्यंगु दु । तिसा पुखूया मौलिकता लित हयेत पुनःनिर्माणया ज्या खरिद प्रक्रियाय् वंगु दु । वडा दुनेया परम्परागत सतकया माैलिक नां तयेगु ज्या अन्तिम चरणय् थ्यंगु दु । मेमेगु सतकया नामाकरण प्रक्रिया न्ह्याःगु दु । धनगनेश देगः पुनःनिर्माण व उगु हे परिसरय् पार्क दयेकेगु ज्या सार्वजनिक खरिद प्रक्रियाय् दु । सतकया जव व खवय् च्वंगु भवनया न्ह्यःनेया ब्वयात एकरुपता बियाः मौलिकता बीगु निंतिं भाइब्रेन्ट हण्डीगाउँ ज्याझ्वः अन्तिम चरणय् दु ।’ प्रजापतिं योजना व ज्याया विस्तृत विवरण बियादिसें धयादिल ।
द्योछेँ फल्चा, थतुटोल फल्चा, दबू फल्चा पुनर्निर्माण, वडा भवन, धनगणेश सत्तल, मालीगाउँ दवू, भित्री शहरया ध्वाखाबहाः व सत्यनारायण देगः प्रवेशद्वार निर्माण ज्या अन्तिम चरणय् थ्यंगु दु । वइगु दँय् नाट्येश्वरी व भीमसेनस्थानय् प्रवेशद्वार दयेकेगु योजना दु । वय्कलं कालोपुल लामो गली, महादेव गली, देछेँ व भाटभटेनी लिउनेया गल्लीइ फायर हाइड्रेन्ट जडान यायेगु, कृष्ण देगः, नासः पाःचाः, मालीगां पाःचाय् मौलिक सभ्यता प्रतिबिम्बित याइगु चित्रकला, धन्वन्तरी पाःचाय् त्वनेगु लःया व्यवस्था याःगु जानकारी बियादिल । वये वने अःपुकेत दुनेया लँयात एकतर्फी जक यायेगु ज्या जूगु दु ।
महानगरया वर्गीकरणय् मझाैला वडाय् लाःगु थ्व वडायात पूर्वय् वडा ल्याः ७, पश्चिमय् वडा ल्याः ३ व ४, उत्तरय् वडा ल्याः ४, दक्षिणय् वडा ल्याः ३०या सिमाना स्वानाच्वंगु दु । १२ द्वः जनसंख्या दुगु उगु वडाय् थ्यंमथ्यं ६ द्वः मतदाता दु । २६०० छेँ दूगु वडाय् थ्यंमथ्यं २४०० म्ह करदाता दर्ता जूगु दु । वडा सचिव विमल ज्ञवालीया कथं चालु आर्थिक दँया नितिं पारित जूगु ८४ योजनामध्ये ८२ योजना कार्यान्वयन जूगु दु । ५० क्वचाःगु दु । वडां आःतक पूँजीगत खर्चय् ४ करोड ३८ लाख खर्च याःगु दु ।
सामाजिक विकासया दिशाय् कापः थायेगु, बाँसुरी पुइगु, चर्या प्याखं, भुतूक्वथायात वासः क्वथा दयेकेगु तालिम क्वचाःगु दु । परम्परागत सीपपाखे कुम्हाः ज्याया तालिम व प्रविधि हस्तान्तरणया व्यवस्था यानातःगु दु । ज्येष्ठ नागरिकया नितिं तीर्थयात्राया ग्वसाः ग्वःगु दु । थौंकन्हय् ब्यूटी पार्लर, स्यानिटाइजर, झोल साब्वं दयेकेगु तालिम जूगु दु । थ्व धुंकाः शैक्षिक परामर्श, मनोसामाजिक परामर्श, कःनिपाया स्वां व बुके दयेकेगु तालिम बीगु योजना दु ।
रुद्रमति, कालोपुल, रमला चोक, पाहेंलो पुल, पञ्चेधारा, सानो गौचरण, टंगाल, मनमानेश्वरी, बिशालनगर, धनगणेश आदि क्षेत्रय् सीसी क्यामरा जडान याःगु दु ।
जीवन्त हाँडीगाउँ वडाया म्हसीका न्ह्यब्वया वयाच्वंगु दु । २०८० असोज ५ गतेनिसें न्ह्याःगु उगु ज्याझ्वलं स्थानीय बासिन्दाया संस्कृति, परम्परा व संस्कार ल्यंकाः आयस्तालय् नं सकारात्मक लिच्वः लाकूगु दु । वडा सदस्य विजयप्रकाश कर्माचार्यया कथं शनिवाः न्हिनय् २ बजे निसें बहनी ८ बजे तक न्ह्याइगु उगु ज्याझ्वलय् छन्हु हे ४० लाख तक कारोबार जूगु दु । हाण्डीगाउँ गुरुयोजना अन्तर्गत सुधार क्षेत्रमध्ये वातावरण सुधारया निंतिं थुगु दिं दथु टोले कृष्ण मन्दिर, दौली चोकनिसें कोटल टोले भाबरकुण तकया सतकखण्डय् सवारी साधन प्रवेश निषेध याःगु खः । थुगु क्षेत्रय् सुथय् ८ बजे निसें बहनी ८ बजे तक सवारी साधन प्रवेश निषेध यानातःगु दु । थ्व क्षेत्रय् हण्डीगाउँया मौलिक जीवनशैली (सुकुल बुनाई, काष्ठकला, कुम्हाःया ज्या), रञ्जना लिपि च्वयेगु कौशल, मौलिक नसा, परम्परागत संगीत, गायन व प्याखं, व मौलिक सामाजिक कासानाप स्वापू दूगु कला व सीपया ग्वसाः ग्वयातःगु दु। कासाय् ब्वति कायेत, नसा नयेत, मौलिक कला स्वयेत तापाक्कं मनूत वइ । थ्व लागां वनीगु सवारी साधनयात धोबी खोला करिडोर व गेहना पोखरीनिसें वडा ज्याकुथितकया आन्तरिक सतक छ्यले दइगु व्यवस्था याःगु दु ।
स्थानीयबासीया अपेक्षा
सहरया मेमेगु थासय् स्वयां थुगु लागाया समस्या फरक मजू । पूर्वाधार दयेकेधुंकाः ठेकेदारं ल्यं दनिगु निर्माण सामग्री लिकायेमफुगुलिं न्यासि वनेत थाकुयाच्वंगु व व हे सामग्रीं धःबन्द याःगु गुनासो वडाबासीपिन्सं याःगु दु । महानगरं लाछि खिचाया व्यवस्थापनय् ज्या यायेमाःगु वडाबासीया माग दु ।
