वडाया भूगोल, वडादुने सञ्चालन जुइगु सामाजिक व सांस्कृतिक ज्याझ्वः, काुसा, समानता, समावेशीकरण, आर्थिक विकास, सेवा प्रवाह व सुविधा इनेज्यायात सन्तुलित विकासकथं वइगु दँया योजनाय् दुथ्याकेगु १८ वडाया नायः न्हुच्छेकाजी महर्जनं धयादीगु दु । वडा ज्याकुथिइ जूगु चालु आर्थिक दँया सार्वजनिक सुनुवाई व वइगु आर्थिक दँया योजना तर्जुमा सहलह ज्याझ्वलय् वय्कलं वइगु दँया योजनाया विषयस जानकारी बियादीगु दु ।
‘चालु आर्थिक दँया २६ गू योजनामध्ये निगू क्वमचाःनि ।’ महर्जनं धयादिल, ‘यक्व मनू, छेँजः व समुदाययात लाभ जुइगु ज्याझ्वःयात प्राथमिकता बी ।’
वडां चालु आर्थिक दँय् कुमारी गल्ली, किसि गल्ली, म्येय्छ्यं हिति गल्ली, लस्का चुक, न्यत न्ह्यःनेया चुक, ताम्सीपाखा फल्चा, तुलाधर दुगुद्यः महाद्यः देगः पुनःनिर्माण याःगु दु । न्यतमरु अजिमा देगलय् लीया पौ तयेगु ज्या, बुरांख्यः पार्क, दमैचाघाट पार्क, तंपिता पार्क, पुष्पलाल पार्क, दुगुचा ख्यः मर्मत व बांलाकेगु ज्या याःगु दु । वैद्यचोकया देगलय् सिँया तिकाझ्याः तःगु दुसा उगु हे चोकय् देगः दयेकाः मूर्ति स्वंगु दु ।
थुकियालिसें सडक मर्मत सम्भार यायेगु, गल्ली व चोकय् ल्वहं व अप्पां सीगु, धः निकास दयेकेगु, मर्मत व पुनःनिर्माण यायेगु ज्या याःगु दु । थीथी देगलय् रंगरोगन यायेगु, मंगालया कभर खरिद यायेगु, थप सीसीटिभी क्यामरा जडान यायेगु, ह्याउँम्ह किसिया बार दयेकेगु ज्या याःगु दु ।
सामाजिक विकासया ज्याझ्वः अन्तर्गत महिला सशक्तिकरणया निंतिं सेल्फ मेकअप, रेशमी काया चुरा दयेकेगुलिसेंया सिपमूलक तालिम, ज्येष्ठ नागरिकया लागि तीर्थाटन, युवा लक्षित नेतृत्व विकास ज्याझ्वः न्ह्याकूगु दु । धिमे बाजा प्रशिक्षणलिसें अमूर्त सम्पदाया संरक्षण, प्रवर्धन व पुस्तान्तरणया ज्याझ्वः जूगु दु । जात्रा पर्व सञ्चालन व व्यवस्थापन यायेगु स्थानीय खलःपुचःयात आर्थिक अनुदान लःल्हाःगु दु ।
वडाया निंतिं विनियोजित ५ करोड तका मध्ये आःतक स्वंगू कोति नौ लख ५७ द्वःतका खर्च जूगु दु ।
चालु आर्थिक दँया साउननिसें आःतकया दुने १ करोड ८० लाख ११ हजार तका राजस्व संकलन जूगु दुसा थकी दकले अप्वः बहालकरपाखें १ करोड ६ लख २९ द्वःतका राजस्व संकलन जूगु दु ।
७ द्वः ८ सः जनसंख्या दुगु वडाय् करिब ३ किलोमिटर कालोपत्रे सडक दु । कालोपत्रे सडकस्वयां यक्व भित्री गल्लीत दु । थथे हे च्यागू परम्परागत चोकत दु । पोषण भत्ता काइपिं ज्येष्ठ नागरिकया ल्याः १७० म्ह दु । थुकथं हे ज्येष्ठ नागरिक, एकल मिसा, पूर्ण अपाङ्गता दुपिं मनूत यानाः सामाजिक सुरक्षा भत्ता काइपिनि ल्याः ६५४ म्ह दु ।
वडाबासीया माग
योजना तर्जुमा ज्याझ्वलय् वडाबासीपिसं माग याःगु योजनाय् गल्ली मर्मत, सुधार, गल्लीइ सीसीटिभी क्यामरा तयाः सुरक्षा प्रत्याभूति, लागु औषध प्रयोगकर्तातय्त निगरानी व नियन्त्रण, गल्लीइ पार्किङ् व्यवस्थापन, चिब्यागु गल्लीयात एकतर्फी दयेकेगु, भचा तब्यागु सतकयात दुईतर्फी सञ्चालन यायेगु, स्थानीयबासी लक्षित ज्याझ्वःयात प्राथमिकता बीगु, मेलम्ची व विद्युतया तार भूमिगत यायेगु झ्वलय् लिच्वः म्हो याकेगु, निर्माण ज्या क्वचायेवं ठेकेदारं ल्यं सामग्री मयंकूगुलिं समस्या जूगुलिं उकियात नियन्त्रण यायेमाःगु, जात्रा पर्वलिसे सम्बन्धित भौतिक संरचनातय्गु पुनःनिर्माण व मर्मत सम्भार यायेगु, सडक, गल्ली व चोकतय्गु स्तरोन्नति यायेगु, जात्रा पर्व सञ्चालन व्यवस्थापन यायेत ग्वाहालि यायेमाःगु योजना माग याःगु दु ।
वडा नम्बर १८ दुनेया वडा खः । महानगरपालिकाया वर्गीकरणय् थ्व चीधंगु वडाय् लाः ।
