येँ महानगरपालिकां सिप मेला न्ह्याकीपिं १३ गू संघसंस्थालिसे सहकार्य सम्झौता याःगु दु । मेला व्यवस्थापन समितिया संयोजक इञ्जिनियर शैलेन्द्र झाया ब्वतिइ, मेला सञ्चालनया निंतिं आर्थिक, प्राविधिक व मानव संशासन उपलब्ध याकाः सहकार्य याइगु संघसंस्थाया प्रतिनिधि व मेलाया व्यवस्थापक गतिशील अभियानया अधिकारीपिनि दथुइ सामाजिक उत्तरदायित्वअन्तर्गतया सहकार्य सम्झौता पत्रय् ल्हाःचिं तयाः कालबिल जूगु खः । मेलाया सहआयोजककथं महानगरपालिकां नेपाल तालिम तथा व्यवसायी महासंघ व इभेन्ट म्यानेजमेन्टया निंतिं गतिशील अभियानलिसे न्हापा हे सम्झौता याये धुंकूगु दु ।
सम्झौता जूगु निजी संघसंस्थात एनसेल, जगदम्बा मोटर्स, गोर्खा व्रुअरी, नेपाल लाइफ इन्स्योरेन्स, आइ.एन.जी. ग्रुप, के.एल. दुगड, पद्म ज्योती ग्रुप, एम.एड.ब्लु ग्रुप, अग्नि इन्टरप्राइजेज व काठमाडौँ मोडेल कलेज दु । संयोजक झाया कथं नेपाल उद्योग वाणिज्य महासंघ, गोल्छा ग्रुप व सूर्य नेपाललिसे सहकार्यया निंतिं सहमति जुइधुंकूगु दु ।
तालिम संयोजक देवेन्द्र के.सी.या कथं प्रशिक्षण साझेदारय् मोडल इन्स्टिच्युट अफ टेक्नोलोजी (इमआइटी), ड्रोन हव, इञ्जिनियर्स भ्लग, स्लिङ्टन कलेज, मिथिला थाली, गेट कलेज, ताली एजुकेसन एण्ड रिसर्च, बागमती एजुकेसन कन्सल्टेन्सी, गरिमा ट्रेनिङ् इन्स्टिच्युट, इ थ्री सेल्स एण्ड सर्भिसेस, नेपाल उद्यमी विकास परामर्श केन्द्र, नेपाल स्थानीय तयारी पोशाक संघ, ओम अप्रायल, ट्रेस, क्वालिटी मल्टिपर्पोज, नेपाल कपडा तथा सिलाइ संघ, बडीमालिका मल्टिपर्पोज, गल्फ इन्टरनेशनल ट्रेनिङ इन्स्टिच्युट, गण्डकी पोलीटेक्निक इन्स्टिच्युट, वल्र्ड वाइड टेक्निकल प्रा. लि., ट्रेड लिङ्क टेक्निकल इन्स्टिच्युट लिसेंया तालिम प्रदायक संघसंस्था दु ।
थुकथं हे पोखरा भ्याली टेक्निकल ट्रेनिङ इन्स्टिच्युट, स्किल्स होम मेटल, प्राइम इन्स्टिच्युट अफ होटल म्यानेजमेन्ट एण्ड इञ्जिनियरिङ, नेशनल इम्प्लोइमेन्ट ट्रेनिङ सेन्टर, अग्नि ग्रुप, जगदम्बा मोटर्स, नेपाल हस्तकला महासंघ, नमस्ते नेपाल प्राविधिक शिक्षालय, फ्लोरिकल्चर एशोसिएसन अफ नेपाल, पर्फेक्ट म्यानपावर ट्रेनिङ सेन्टर, श्रृङ्गार घर प्रा. लि., इन्टरनेशनल पोली टेक्निक प्रा. लि., शिवशक्ति ट्रेनिङ सेन्टर, माण्डु मो, सिकिन्छ एकेडेमी प्रशिक्षण साझेदार जूगु दु । डिजिटल पार्टनरय् युरानस टेक दु ।
सम्झौता समारोह न्ह्यानाच्वंगु इलय् पूर्व उपप्रधानमन्त्री नारायणकाजी श्रेष्ठ मेला स्वयेत झाःगु खः । वय्कलं महानगरपालिकां न्ह्याकूगु सिप मेलां सामाजिक न्यायलिसेंया समृद्धिया निंतिं योगदान बीगु बिचाः तयादिल ।
ज्याझ्वलय् सहरी योजना आयोगया उपाध्यक्ष लिसें मेला निर्देशक समितिया संयोजक डा. सुमननरसिंह राजभण्डारीं मेलां लजगाः व स्वरोजगारपाखें थम्हं छुं याये फइ धइगु चेतनाया विकासय् ताःलिच्वः बीगु अपेक्षा यानादिल ।
मेलाया सल्लाहकार रञ्जित आचार्यं स्थानीय सरकारं निजी क्षेत्रलिसेया सहकार्यय् ग्वसाःग्वःगु मेलां सहभागितामूलक विकासया उत्कृष्ट नमूना जूगु खँ न्ह्यथनादिल ।
थथेहे च्याम्बर अफ कमर्शया वरिष्ठ उपाध्यक्ष दीपक श्रेष्ठं मेलाया आयातनयात अप्वयेका यंकेमाःगु खँ तयादिल । मेलां प्रशिक्षित ७५ म्ह जनशक्तियात थःगु कम्पनी व च्याम्वर अफ कमर्सपाखें लजगाः बीगु वय्कलं कनादिल ।
जगदम्बा मोटर्सया कार्यकारी निर्देशक अखिल गुप्तां तालिम बियाः अन द जब ट्रेनिङ व लजगाःलिसे स्वायेगु मेलाया दकले बल्लाःगु पक्ष जूगु खँ तयादिल ।
जेठ ७ गतेनिसें न्ह्याःगु मेलाय् १० क्षेत्रया ३७ पेशालिसे सम्बन्धित तालिम न्ह्यानाच्वंगु दु ।