अन्तर्राष्ट्रिय स्तरय् नेपाःया छवि स्यनावनाच्वंगु खँय् डा. महेशमान श्रेष्ठया च्यूताः

अन्तर्राष्ट्रिय स्तरय् नेपाःया छवि कलंकित जुयाच्वंगु खँय् नागरिक न्ह्यलुवा डा. महेशमान श्रेष्ठं च्यूताः प्वंकादीगु दु । नेवाः मिसा ग्वाहाली पुचः व नेवाः ग्वाहाली पुचः काठमाडौं महानगर वडा ल्याः २६ पाखें न्ह्याकूगु क्षमता विकास प्रशिक्षण ज्याझ्वलय् वय्कलं देय्या निंतिं चिउताः प्वंकादीगु खः । उगु ज्याझ्वलय् वय्कलं नेपाली कांग्रेस, नेकपा एमाले, माओवादी लगायतया पार्टीतय्सं गलत प्रवृत्ति दुपिं नेता कार्यकर्तातय्त संरक्षण यानाच्वंगु खँय् आक्रोश प्वंकादीगु खः । आः झीसं देय्यात मतिना याइपिं देशभक्ततय्गु एकीकृत मोर्चा दयेकेमाःगु दु ।” थ्व मोर्चायात सार्वजनिक भाषण लिसेंया थीथी पक्षय् प्रशिक्षण बियाः उचित शासन व्यवस्था कार्यान्वयन यायेगु दिशाय् न्ह्याकेमाः ।’ डा. श्रेष्ठं धयादी ।
खय्त ला नेपालय् न्यनाच्वंगु भ्रष्टाचारया बारे बीबीसी, सीएनएन, अल जजीरा, फक्स न्यूजं समाचार प्रसारण याःगु दु । थुकिं अन्तर्राष्ट्रिय रुपं नेपाःया छवि स्यंकूगु दु ।
डा. श्रेष्ठं भ्रष्ट नेतातय्गु थासय् इमान्दार, सक्षम व देय्यात धात्थें मतिना याइपिं नेतात माः धयादीगु दु । वय्कलं थौंकन्हय् न्हू पुस्तां थःगु मांभाय् प्रति वितृष्णा यानाच्वंगु खँय् च्यूताः प्वंकादिसें नेपाल भाषा क्लब, आदिवासी नेवाः राजनीतिक अभियान, नेवा: ग्वाहाली पुचः व नेवाः मिसा ग्वाहाली पुचलं भाषा संरक्षणय् याःगु योगदानयात कयाः चर्चा यानादिल ।
सामाखुसिइ च्वंगु प्रज्ञा विद्यालयया हलय् प्यलापतिकं जुइगु उगु प्रशिक्षण ज्याझ्वलय् घोषणा, औपचारिक ज्याझ्वलय् न्ववायेगु शैली, संस्था गुकथं न्ह्याकेगु धइगु विषयस प्रशिक्षण बीगु जूगु दु । ग्वाहाली पुचलं थ्वसिबें न्ह्यः कीर्तिपुर, तार्केश्वर गाँउपालिकाया मनमैजु, फुटुङ, धर्मस्थली, थिमि व तोखालिसें येँया थीथी गामय् प्रशिक्षण ज्याझ्वः क्वचायेकूगु दु । उगु ज्याझ्वलय् महानगर दुनेया थीथी वडाया जनप्रतिनिधि, समाजसेवी, शिक्षाविद्, गृहिणीपिनिगु ब्वति दुगु खः ।