फोहरया स्रोतय् वर्गिकरण मजुयाः समस्या

येँ महानगरपालिकां फोहरयात स्रोतय् प्रभावकारी वर्गिकरण यायेमफुसा दिगो व्यवस्थापन याये मफइगु धाःगु दु ।
येँमनपां अस्पतालजन्य फोहर व्यवस्थापनया निंतिं सरोकारवालातनापंया सहलहस उगु बिचाः न्ह्यब्वःगु खः । येँमनपा वातावारण व्यवस्थापन विभागया प्रमुख सीता राईं छथाय्या फोहर मेगु थासय् व्यवस्थापन यायेवं दिगो मजुइगु, उकिया निंतिं स्रोतय् प्रभावकारी कथं ब्वथलेमाःगु धयादीगु दु ।
येँमनपां आर्थिक दँ २०७९/८० निसें आःतक थीथी स्वास्थ्य संस्थाय् ९६ क्वः हानिकारक फोहर व्यवस्थापन अनुगमन याःगु धाःगु दु । येँमनपा वातावरण निरीक्षक सृष्टि श्रेष्ठयाकथं छुं अस्पतालय् स्वक्वःसिबें अप्वः अनुगमन याःगु दु । थुगुसी नं अस्पताल, क्लिनिक, पोलिक्लिनिक, डेन्टल क्लिनिक, आइभीएफ सेन्टरया अनुगमन याःगु दु । अनुगमन याःगु स्वास्थ्य संस्था मध्यय् न्ह्यानाच्वंगु आर्थिक दँय् अनुगमन जूगु स्वास्थ्य संस्थाया प्रतिनिधि अनिवार्य द्ुथ्याइगु यानाः सोमबाःनिसें हानीकारक फोहर व्यवस्थापन व तरल फोहर प्रशोधन प्रणालीया विषयस प्रशिक्षण न्ह्याःगु दु ।
सहरी योजना आयोगया दुजः प्रसुन्नरत्न बज्राचार्यं छेँखा पतिकं छेँय् वासःजन्य फोहरया मात्रा दयावःगुलिं अस्पतालं सामाजिक उत्तरदायित्व अन्तर्गत फोहरपाखें जुइगु जनस्वास्थ्य व वातावरणीय लिच्वः गथे यानाः म्हो यायेगु धइगु विषयस ज्या यायेगु ई वःगु धयादिल ।
प्रशिक्षणय् स्वास्थ्य संस्थाजन्य फोहरया प्रकृति व व्यवस्थापन विधिया विषयस प्रस्तुतिकरण यानादिसें जनस्वास्थ्यलिसें वातावरण प्रवद्र्धन केन्द्रया कार्यकारी निर्देशक रामचरित्र शाहं सावधानी व सचेतना दुसा स्रोतय् हे फोहरया मात्रा म्हो याये फइगु धयादिल ।
विश्व स्वास्थ्य सङ्गठनया कथं स्वास्थ्य संस्थापाखें छगू शय्याय् न्हि ०.९९ किलोनिसें १.७३ किलोतक फोहर उत्पादन जुइ । थथे उत्पादन जूगु सङ्क्रामक फोहरयात निर्मलीकरण मयासें व्यवस्थापन याःसा जनस्वास्थ्य, फय्, लः व चाया सम्पर्कय् वयाः मनूनापं जैविक तत्वयात प्रत्यक्ष, अप्रत्यक्ष व दीर्घकालीन समस्या वये फु ।