भारतं लिहां वःपिंके कोरोना सङ्क्रमण, माक्वः कीट मदयाः परीक्षणय् समस्या

सुदूरपश्चिम स्वास्थ्य निर्देशनालयया कथं लिपांगु छवाःया दुने जक हे भारतं लिहां वःपिंमध्यय् १६ म्हेसिके कोरोना सङ्क्रमण पुष्टि जूगु दु । कैलालीया त्रिनगर नाका व बैतडीया झुलाघाट नाकापाखें दुहां वःपिंके न्हिया न्हिथं सङ्क्रमण खने दूगु खः । नाकाय् च्वंगु हेल्थ डेस्कय् माक्वः कीट मदया परीक्षण जुइ फयाच्वंगु मदु । सुदूरपश्चिम स्वास्थ्य निर्देशनालयया कथं मंगलबाः नं सुदूरपश्चिमय् भारतं वःपिं निम्हेसिके सङ्क्रमण पुष्टि जूगु दु । निर्देशनालयया कथं गौरीफन्टा व झुलाघाट नाकाय् छम्ह–छम्हेसिके सङ्क्रमण खनेदूगु खः । सुदूरपश्चिमया थीथी नाकां ६४३ म्ह नेपाःमित दुहांवःगु दु । थुकिमध्यय् १४ म्हेसिया परीक्षण याःगुलिइ निम्हेसिके सङ्क्रमण पुष्टि जूगु खः । गड्डाचौकी नाका भारतया राजधानी दिल्लीपाखें दकसिबे सतीगु नाका खः । थ्व हे नाका जुयाः भारतया थीथी थाय्या निंतिं नेपाः–भारत मैत्री बसया सञ्चालन जुयाच्वंगु दु । परीक्षण कीट मदयाः यात्रुया स्वास्थ्य परीक्षण याये फयाच्वंगु मदु । त्रिनगर नाकाय् कोरोना सङ्क्रमण पुष्टि जूपिं अप्वः यानाः भारतया दिल्लीपाखें छेँ लिहांवःपिं मनूत दु । थुकिं सुदूरपश्चिमय् कोरोनाया जोखिम उच्च खनेदूगु स्वास्थयकःमितय्सं धाःगु दु । विभागं २०० कीट छ्वयेधुंकाः आः प्रदेशय् ३७० कीट जक उपलब्ध दूगु सुदूरपश्चिम स्वास्थ्य निर्देशनालयं धाःगु दु । कञ्चनपुरया गड्डाचौकी नाकाय् १०० कीट मंगलबाः उपलब्ध जुइ धुंकाः परीक्षण न्ह्याकूगु दु । जिल्ला स्वास्थ्य ज्याकुथि कञ्चनपुरया प्रमुख ओमप्रकाश जोशीं मंगलबाःनिसें नाकाय् परीक्षण न्ह्याकूगु धाःगु दु । “जिमिके १०० कीट जक वःगु दु थ्व तसकं म्हो जक खः”, वय्कलं धयादिल, “आः नाकाय् लक्षण खनेदूपिनिगु जक परीक्षण यायेगु व्यवस्था यानाः तयागु दु ।” वय्कःया कथं मंगलबाः गड्डाचौकी नाकाय् न्हय्म्हेसिगु परीक्षण याःगु खः । स्वास्थ्यकःमितय्सं हेल्थ डेस्कय् भारतपाखें लिहांवःपिनिगु स्वास्थ्य अवस्था व लक्षणया बारे न्यनेकने नापं मलेरिया, डेङ्गीलिसें मेमेगु परीक्षण व परामर्श बिइगु यानाःच्वंगु दु । “वइपिं आप्रवासीतय्त कडाइ ला याःगु दु तर कीटया अभावं परीक्षण याये फयाच्वंगु मदु”, गड्डाचौकी हेल्थ डेस्क प्रमुख विशाल भट्टं धयादिल, “शंकालगे जूपिंत छवाःया निंतिं छेँजःनाप ब्यागलं च्वनेत धयाः छ्वयेगु यानाः च्वनागु दु ।” न्हापा न्हापा इलय् हे नाकाय् कडाइ याये मफयाः सङ्क्रमण न्यनावंगुलिं सरकारं नाकाय् कडाइ यायेमाःगु स्थानीयया धापू दु । “गड्डाचौकी नाकां वइपिनिगु कोभिड परीक्षण जुइ फयाच्वंगु मदु”, स्थानीय पदम थापां धयादिल, “नाकापाखें लिहां वयाच्वंपिं स्वास्थ्य परीक्षणया निंतिं हेल्थ डेस्कय् वनीमखू, सुरक्षाकःमितय्सं पंगु खनेमदु ।” वय्कलं भारतं वइगु जीप, कार व बसत नाकाय् मदिकुसें तप्यंक नेपाः दुहां वनाच्वंगु धायादिसें प्रशासनं नाकाय् दिकाः हेल्थ डेस्कय् जाँच याकेमाःगु धयादिल । कोरोना महामारी लिपा सुदूरपश्चिमय् कञ्चनपुरया गड्डाचौकी, कैलालीया त्रिनगर, बैतडीया झुलाघाट व दार्चुलाय् हेल्थ डेस्क निस्वनातःगु दु ।