सभामुख देवराज घिमिरें राज्यं मांभाय् संरक्षणया निंतिं माःगु नीति दयेकेमाःगु खँय् बः बियादीगु दु ।
नेवाः पत्रकार राष्ट्रिय दबूया ग्वसालय् यलय् जूगु निक्वःगु अन्तरराष्ट्रिय मातृभाषा पत्रकारिता सम्मेलनया उलेज्या यानादिसें वय्कलं मांभासं पत्रकारिता यायेगु सन्दर्भय् नं हाथ्या खनेदयाच्वंगु धयादिसें थुकियात संरक्षणया निंतिं ध्यान बिइमाःगु बिचाः प्वंकादिल ।
“अन्तरराष्ट्रिय सम्मेलनपाखें तयार जुइगु महत्वपूर्ण दस्तावेज मांभाय्या संरक्षण यासें देय्यात बल्लाकेगु सन्दर्भय् ज्या वयेत्यंगु दु । लिपांगु ई वःगु राजनीतिक उपलब्धि संरक्षणया निंतिं ज्या जुयाच्वंगु दु । देय्या १२४ गू जातजातिया नापनापं लोपोन्मुख भाय्या संरक्षणया निंतिं ज्या जुयाच्वंगु दु । देय्या ६२गू भाय् संरक्षणय् रासस, सार्वजनिक प्रसारण संस्था व गोरखापत्रं नं ज्या यानाः वयाच्वंगु दु, थ्व बांलागु ज्या खः”, सभामुख घिमिरे धयादिल ।
वय्कलं अन्तरराष्ट्रिय सम्मेलन थीथी जातजातिया अवस्थिति, तजिलजिया संरक्षण व छम्हेस्यां मेम्हेसियागु विचाःत सम्प्रेषण यायेगु सन्दर्भय् महत्वपूर्ण जुइगु विश्वास प्वंकादिल ।
सभामुख घिमिरें धयादिल, “थ्व सम्मेलनया आज्जु नेपालय् मांभाषं पत्रकारिताया वर्तमान अवस्था व थुकिया विकासया प्रवृत्तिबारे जानकारी कालबिल यायेगु खः, अन्तरराष्ट्रियस्तरय् जुयाच्वंगु प्रगतिबारे नं थुइकेगु ह्वःताः चूलाकेगु खः । थुकिं नेपालय् मांभाय् पत्रकारितायात अझं व्यावसायिक, समावेशी व पहुँचयोग्य दयेकेगु लँपुइ योगदान जूइत्यंगु दु ।”
नेपाःया न्हापांम्ह मांभाय् पत्रकार धर्मादित्य धर्माचार्य (जगतमान वैद्य) पाखें मांभाषं पत्रकारिता न्ह्याकूगु १०१ दँ क्यंगु लसताय् जूगु थ्व सम्मेलन विशेष महत्वं जाःगु धयादिसें सभामुख घिमिरें धर्माचार्यया ज्यां मांभाय् पत्रकारिताया जग तयादीगु धयादिल ।
सम्मेलनय् माभासं पत्रकारितायात तिबः बीगु निंतिं याेगदान बियावयाच्वंगु सरकारी सञ्चार माध्यमत गाेरखापत्र, रेडियाे नेपाल, नेपाल टेलिभिजन, राष्ट्रिय समाचार समिति, पत्रकारिताया नियामक संस्था प्रेस काउन्सिल नेपाल, ताःइलंनिसें पत्रकारिता ख्यलय् याेगदान बियाच्वनादीपिं मल्ल के सुन्दर, अजितमान तामाङ, गणेश राई, सार्क जर्नलिष्ट फाेरमया महासचिव एमडी. अब्दुर रहमान व भारतपाखें डा. शशिभुषण कुमारयात धर्मादित्य धर्माचार्य पत्रकारिता हनापाखें सम्मान याःगु खः ।
सार्वजनिक प्रसारण संस्थाया नायः डा महेन्द्र विष्टं मांभाय् पत्रकारिता प्रवद्र्धनया निंतिं ताः ई निसें योगदान जुयाच्वंगु धयादिसें थुकिं समुदायय् सुचं व बुखँ प्रवाहय् प्रभावकारी भूमिका म्हितीगु धयादिल ।
सम्मेलनया कजि लिसें नेवाः पत्रकार राष्ट्रिय दबूया वरिष्ठ न्वकू सुनिल महर्जनं नेपाःया हरेक राजनीतिक ह्यूपालय् मांभाय् पत्रकारितां माक्वं योगदान याःगु व थुकिं सामाजिक व सांस्कृतिक जागरणया निंतिं महत्वपूर्ण भूमिका म्हितूगु दु धकाः बिचाः प्वंकादिल । संविधानं नेपाःया फुक्कं भाय्यात राष्ट्रभाषाया कथं काःगु व थ्व थौंया व्यवस्थाया उपलब्धि जूगु वय्कलं धयादिल ।
नेवाः पत्रकार राष्ट्रिय दबूया मूछ्याञ्जे के के मानन्धरं १३ दँ न्ह्यः पलिस्था जूगु नेवाः पत्रकारतय्गु थूगु संस्थां पत्रकारया हकहित, अभिव्यक्ति स्वतन्त्रताया पैरवीया नापनापं समावेशी पत्रकारिता व मांभाषं पत्रकारितायात न्ह्याकेगु सन्दर्भय् सक्रिय जुयाः न्ह्याः वनाःच्वनागु धयादिल ।
न्हापांगु न्हि यलया खुमलटाय् च्वंगु राष्ट्रिय प्रकृति संरक्षण काेषय् जूगु ज्याझ्वलय् मातृभाषा संरक्षणया निंतिं पत्रकारिता व अन्तर्राष्ट्रिय मातृभाषा पत्रकारिताया अवस्था बारे प्यानल डिस्कसन जूगु खः ।
थुकथं हे मातृभाषा संरक्षणय् सरकारी सञ्चार माध्यमया याेगदान विषयस वरिष्ठ पत्रकार पुष्कर माथेमा व धर्मादित्य धर्माचार्यया विषयस सृजना वैद्यं ज्यापाै न्ह्यब्वयादीगु खः ।
ज्याझ्वलय् धर्मादित्य धर्माचार्यया म्हसीका सफू व सुरेश किरणं च्वयादीगु २०४६ साल जनआन्दाेलनय् विश्वभूमि न्हिपाैया भूमिका सफू पिथनेज्या जूगु खः ।
दबूया नायः नृपेन्द्रलाल श्रेष्ठया सभानायःसुइ जूगु ज्याझ्वः दबूया दुजःपिं कबिता श्रेष्ठ व राजेश बज्राचार्यं मंकाःकथं न्ह्याकूगु खः ।
निक्वःगु अन्तर्राष्ट्रिय सम्मेलन थाैं थिमिइ क्वचायेकीगु ज्याझ्वः तयातःगु दु ।
थ्व सिबें न्ह्यः २०८१ साल जेठ १९ व २० गते न्हापांगु अन्तरराष्ट्रिय मातृभाषा पत्रकारिता सम्मेलन जूगु खः ।