प्रतिपक्षी दल राष्ट्रिय स्वतन्त्र पार्टी (रास्वपा) या विरोध व राष्ट्रिय प्रजातन्त्र पार्टी (राप्रपा)या बहिस्कारया दथुइ प्रतिनिधिसभाया थौंया बैठक न्ह्याःगु दु ।
प्रतिनिधिसभाया थौंया बैठकया ज्याधलः कथं विनियोजन विधेयक, २०८२ अन्तर्गत राष्ट्रपतिया ज्याकुथि, उपराष्ट्रपतिया ज्याकुथिलिसें थीथी मन्त्रालयनापं विनियोजनया थीथी शीर्षकय् सहलह जुइत्यंगु दु ।
थौंया बैठक न्ह्यायेवं प्रतिपक्षी दल रास्वपा व राप्रपाया सांसदं थःगु थासं दनाः विरोध याःगु खः ।
सभामुख देवराज घिमिरें बैठक नियमित सञ्चालन यानाः आर्थिक विधेयक पारित यानाः आः वइगु आर्थिक दँया बजेट पारित यायेमाःगु जूगुलिं बैठक सञ्चालनया वातावरण दयेकेत इनाप यानादिल ।
अथे खःसां वय्कःपिंसं सभामुखया इनापयात माने यानामदी ।
बैठकय् रास्वपाया अशिम शाहं ‘भिजिट भिसा’ प्रकरणय् तुरुन्त निष्पक्ष छानबिन मजूतले थःपिनिगु विरोध न्ह्यानाः च्वनीगु धयादिल ।
वय्कलं सदनय् लच्छि न्ह्यःनिसें विरोध जुयाच्वंसां नं सुनुवाइ मजूगु गुनासो यानादिल ।
राप्रपाया धवलशमशेर राणां तीनकुने घटनाया निष्पक्ष छानबिन यायेत माग यानादिल ।
थ्व लिसें तुं सभामुख घिमिरें बैठक नियमित ज्याधलखय् दुहांवंगु घोषणा यानाःदीगुलिं रास्वपाया सांसदतय्सं नाराबाजी यानाः वेल घेरय् यानाः च्वनादीगु दु ।
बैठक सञ्चालनया निंतिं वातावरण दयेकेत सभामुखनाप माग यासें सत्तापक्षया सांसदपिंसं नं रास्वपा व राप्रपाया सांसदपिंत पंगः मथनेत इनाप यानादिल ।
थौंया बैठकय् विनियोजन विधेयक, २०८२ अन्तर्गत युवा लिसें खेलकुद मन्त्रालय, महिला, बालबालिका लिसें जेष्ठ नागरिक मन्त्रालय, अर्थ मन्त्रालय, सहरी विकास मन्त्रालय व प्रधानमन्त्री लिसें मन्त्रिपरिषद्या ज्याकुथि, राष्ट्रिय योजना आयोगया सचिवालय, राष्ट्रपतिया ज्याकुथि, उपराष्ट्रपतिया ज्याकुथि शीर्षकय् सहलह जुइत्यंगु दु । (रासस)