मुग्लिन–मलेखु सडकखण्डया प्यंगू ताँय् आरसीसी बीम (गर्डर) जडान यायेगु ज्या थौं सुथय् क्वचाल । थुकिया लिसें थनिंनिसें बहनी सतक आवागमन अवरुद्ध मजुइगु धाःगु दु ।
नागढुंगा–मुग्लिन सतक आयोजना ज्याकुथिं पृथ्वी राजमार्गया नैबिसे–मलेखु सतकय् गर्डर तयेमाःगुलिं उगु खण्ड थौं व कन्हय् बहनी बन्द यायेगु जानकारी ब्यूगु दु ।
नागढुंगा–मुग्लिन सतक आयोजना पश्चिम खण्डया प्रमुख केदारप्रसाद नेपालया कथं बाराबाङ, मोवा, खटौती व गोमती खोलाया ताँय् आरसीसी बीम जडान यायेगु ज्या क्वचाःगु दु । निगूया ढलान मध्य असारतक क्वचायेके फयेमा धकाः ज्या न्ह्यःने हयागु वय्कलं धयादीगु दु ।
भारतं तःधंगु क्रेन हयाः दयेकूगु बीम पुलय् तयेमाःगुलिं ३० जेष्ठनिसें ७ असारतक बहनी सतक यातायात रोके यानाः ज्या याःगु खः ।
थ्व खण्डय् च्वंगु प्यंगू ताँय् क्रेनं बीम तयेवं थौं व कन्हय् थ्व हे परियोजना अन्तर्गत नौबिसे–मलेखु खण्डय् निर्माणाधीन गलौडी खुसिइ बीम तयेगु ज्या जुयाच्वंगु दु । आयोजनां छगू सुचं जारी यासें बीम तयेत बहनी १०ः३० ता ईनिसें सुथय् ३ः०० ता ईतक निन्हुतक यातायात बन्द यायेगु जानकारी ब्यूगु दु ।
आयोजना ज्याकुथिं मुग्लिन–मलेखु सतकखण्डय् ३२ प्रतिशत ज्या क्वचाःगु जानकारी ब्यूगु दु । थुगु खण्डय् ८ किलोमिटर सतक कालोपत्र याःगु दु । चितवनपाखे लेवाटार, कुरिनटार, चुम्लिङटार, फिस्लिङ बजार क्षेत्रय् ब्ल्याकटपिङ याःगु दु । धादिङपाखे मझिमटार, चरौडी व विशालटारय् झिंस्वंगू मिटर चौडाईया च्यागू लेनया सतक कालोपत्र याःगु दु । धादिङया मझिमटार व विशालतारय् थ्यंमथ्यं निगू किलोमिटर ब्ल्याकटप यायेगु तयारी जुयाच्वंगु दु ।
नेपालं धाःगु दु, “थ्यंमथ्यं ८ किलोमिटर सतक कालोपत्र यायेधुन, मौसमं ग्वाहालि यात धाःसा थप निगू किलोमिटर सतक कालोपत्र यायेगु जुइ ।” परियोजना इन्जिनियर विजय दरैया कथं मेगु निगू तांया जगया ज्या जुयाच्वंगु दु । धादिङपाखेया चरौडी व हुग्दीइ जगया ज्या जुयाच्वंगु दु ।
‘थ्व खण्डय् २.२ किलोमिटरया ६ लेनया सतक दयेकेगु जुइ, गुगु मलेखु, बेनिघाट व मुग्लिन खण्डय् लाः, च्यागू लेनया सतक ७.२ किलोमिटर ताःहाकः जुइ, थ्व रामल डाँडा, कुरिनटार, फिस्लिङ, चुम्लिङ, मझिमटार, बिशाल लागाय् नं जुइ, चरौडी लागाय् नं जुइ । थतक्वत यायेमाःगु लँय् स्वंगू लेखनया क्लाइिम्बङ लेन नं दयेकीगु जूगु दु, गुगु २.३ किलाेमिटर ताःहाकः जुइ ।’ इन्जिनियर दरै नं धयादीगु दु । वय्कःया कथं सतकया ल्यं ब्व डेडिकेटेड निगू लेनया जुइ ।
२०७९ साल पौष १५ गते स्वदँय् क्वचायेकेगु कथं सतक ठेक्का ब्यूगु खः । पृथ्वी राजमार्ग अन्तर्गतया मुग्लिन–नागढुंगा सतकखण्डयात स्वंगू ‘प्याकेज’य् ब्वथलाः बोलपत्र आह्वान याःगु खः । थ्व स्वंगूगु प्याकेजय् लाः । थुगु प्याकेजय् ३८.८६ किमि दु ।
४८ अर्ब ५९ लाख लागतय् थ्व खण्ड स्तरोन्नति यायेगु ठेक्का शर्मा–जेडअाइसिजीं त्याकूगु परियोजना इन्जिनियर दरै नं जानकारी ब्यूगु दु । सतकया थीथी क्षेत्रय् धः दयेकेगु, चलः दिकेगु ज्या, पःखाः चीकेगु, पःखाः तयेगु, सतक सुरक्षाया ज्या जुयाच्वंगु दु । थ्व लँ विश्व बैंकया ग्वाहालिं दयेकूगु खः ।