सिलाफःया पुखू नाप स्वाःगु बानासुरया बाख

मदनराम कर्माचार्य “कान्तिपुरी”
थानकोट  सिलाफलं च्वय् थानकोट गोदाम धाःथाय् न्हापा न्हापा धाप याने ध्याचः बुद्रुगबुद्रुग जूथाय् लागासं बानासुर राक्षस च्वनीगु खः किंवदन्तिकथं । अन न्हियान्हिथं वहे सिलाफल लागाय् च्वंपिं जनतातसें पालंपाः वहे राक्षसया जना नकः यंकी । नय् धुंकाः नके यंकूम्हसित ग्वय्या रुपय् नयाबिइ न्हियान्हिथं । जनता न्हिथं पाः जुजुं वनाच्वन ।
सिलाफलया पुखू (थौं म्हिगः लः मदु, जात्रा पतिं लः थनेगु याइ) याने वानासूर राक्षस थुनाः स्याःगु पुखू । थुगु पुखुली राक्षसया छ्यं क्वफानाः ल्हाःगु जुल । न्हाय् थुंथाय् न्हय्रः याने इमाखेल थानकोट चोक ठाडोबाटो धाइ थौंम्हिगः । म्ह याने शरीर ल्हाःगु थाय् थानकोट त्रिभुवन पार्क याने इमालोहंसः ल्हाःगु जुल । तुति गुँ दे याने किपुली याने अनया पुखुली को फाःगु जुल धाइ ।
अले दँय्दसं सिलाफलया पुखुली मेय् छ्यं कोफानाः, त्रिभुवन पार्कसं म्ह ल्हाःगु थासय् किपूया पुखुलिइ तुति क्वफानाः जात्रा न्याय्की । दँय्दसं न्ह्याना वयाच्वंगु प्रचलन आः तकं न्ह्याकाच्वंगु दुगु जुल ।
च्वय् धया थें वानाशुर राक्षसयात न्हियान्हिथं जा नकः वनेमाः छेँखा पतिकं पालंपाः कयाः । अथे हैगु जा नय्धुंकाः ग्वय् स्वरुपय् जाः हःम्ह मनू नया बी । एवम् प्रकारं सिलाफःया लागाया मनूत पाः जुजुं वन ।
छन्हु अथे जा नकः वनेगु पाः काय् व मां निम्हजक दुगु छेँय् लाःगु जुयाच्वन । मांम्हं फक्को मांम्हं जिं जा नकःवने जि बुढी नं जुइ धुंकल धाइगु, काय्म्ह फक्को काय्म्हं जि काय् दय्कदय्कं मां छाय् वनेगु ? जि हे वने धकाः न्वानाः धयाच्वंगु छम्ह ब्याचां न्यनाच्वंगु जुयाच्वन । उम्ह ब्यां काय्म्हं जा नकः वने न्ह्यो हे वानासूर राक्षसया थासय् छगू कुनय् वनाः च्वनाच्वन । बुरिया काय् नं जा नकः वन वानासूरयात । वानासूरयात हःगु जाब्व नय् धुंकाः ग्वय्या रुपय् जा हःम्हसित नय् त्यंबले कुंचाय् च्वना च्वंम्ह ब्यांचां धाल कि अय् वानासुर छं जितः ला नय् फइमखु अपाय् धिकःम्ह मनूयात गथे नय् फइ, फइमखु धकाः धाय्वं व्यांचित धकाः उम्ह वानासूरं हय्काः वंबलय् व्यांचा तिंक तिंक तिंन्हुयाः छलय् जुल । एवंप्रकारं गोदाम धाःथाय्या धापं सिलाफलया पुखुलीतक छलय् याना हल । उम्हं ब्यां लानाः नय् मफुत बानासूरं । आखिरय् उम्ह बानासूर राक्षस सिलाफलया पुखू याने अन बुद्रुक बुद्रुक ध्याचः मुना च्वंथाय् ब्यांचा लेहेँ दनाः छलय् जुल सा बानासूर वहे ब्यांचा च्वंगु ध्याचः दुगु पुखू गालय् दुनां थाहां वय् मफुत छ्यं छगः जक खने दय्क दुन । अले उम्हँ ब्यानं धाल छिपिं मनूत जुयाः नं आम्थे छुं याये मफय्का च्वने ला । आः बले लाक्क देय् दक्व छेँखापतिकं छु छु हतियार दु ज्वना वयाः छेँखा पत्तिकंया मनू तःम्ह सित । छिपिं फुक्क जाना दायाः पालाः सुयाः स्याःहुँ धाय्वं अथे सिलाफलया जनतात मुनाः जानाः ध्याचलय् दुना च्वंम्ह बानासूर राक्षसयात पालंपाः हतियारं दायाः पालाः सुयाः स्याना हे बिल ।
लिपासं अनया जनतापिसं झी दक्कोसिया ज्यान बचय् जुइगु उपाय् उम्हँ ब्यांनं उर्दि याने बुद्धि विवेक बियाः नं झी फुक्क उद्धार याःम्ह ब्यांयात झीसं झःझः धाय्क हनेमाः धकाः दँय्दसं गुन्हुपुन्हिबलय् बूवः घासा फ्वयाः चुलि वःगुयात मुतुचा धाइ, थुगु मुतुचासमेतं भ्वय् ज्वलं ब्याँचा लप्ते तयाः थःथःगु बुँइ ब्यांजा नकःवनीगु प्रचलन न्ह्याकाहःगु नं खःगु जुल ।
लिच्वः खँ थथे जुल कि ब्यांचिगु उर्दीकथं स्याये धुंका बानासूर राक्षसयागु छ्यं सिलाफलय् पुखिलिइ कोफाइ । न्हय्रः (थउँ म्हिगः थानकोट चोक ठाडो बाटो) धाःथाय् न्हाय् ल्हाकल । म्हयाने शरिर थानकोट त्रिभुवन पार्क न्हापाया नां ईमाल्वं धाःथाय् ल्हाःगु खः । तुति गुँदे याने किपूया पुखुलिइ क्वफाःगु जुयाच्वन ।
गन गन याने छ्यं, न्हाय्, म्ह (शरिर) क्वफाःगु व ल्हाना छ्वःगु जुल । अन अन थाय् उगु उगु हे ज्वलं क्वफानाः दँय्दसं जात्रा न्यायेकाच्वंगु दसि (प्रमाण) स्वरुपं न्ह्याना वा न्ह्याकाच्वंगु द हे दनि । झीसं गुन्हुपुन्हि नखःया कन्हे कुन्हु याने जनै पूर्णिमाया कन्हे कुन्हु जात्रा जुइगु स्वःवने फुगु नं जुल । उकुन्हु गोदाम धाःथाय्या धापं निसें वानासूर राक्षस रुपयात जवं खवं ल्हाःज्वना हई लिसें वया कलाःया स्वरुपय् राक्षसनीयात नं जात्राया रुपय् सिलाफलया पुखुलिइ हयाः च्वय् बिया थें जात्रा पूग्यंकाः याने पूवंका कोचाय्किइगु जुयाच्वन ।