यलय् न्यकू जात्रा मतयाःया तयारी पूवन

यलया गलिगलिइ चुक चुकय् थ्यंक दुहां वनाः थ्यंमथ्यं २००० द्यःपिन्त मत, कपू, हलः, चकलेट, धेबा थें जाःगु थीथी ज्वलं छानाः याइगु याः मतयाःया दक्वंकथंया तयारी पूवंग दु । न्यकू जात्रा संचालन मूल समारोह समिति क्षेत्र नं. १० नकबहिलं छगू पत्रकार सम्मेलन यासें थुगु खँया जानकारी ब्यूगु खः ।

भाद्रकृष्ण द्वितीया पर तृतीया अथेधायेबलय् थुगु दँय् भाद्र ५ बुधवार लाःगु थुगु मतयाः यल नगर प्यखें च्वंगु प्यंगः थूर चाःहिलेगु झ्वलय् थुगु नगर दुनेया चिभाः, देगः, बहाः, बही, धर्मधातु, बागीश्वर चाःहिलेगु (१२ घौ सिबें अप्वः) चाःहिलेगु परम्परा खः ।

मतयाः सुथसिया ४ ताः इलय् नकबहिलिं न्ह्याइ । थुगु याःया लँ क्यनेगु ज्या बज्राचार्य गुरुजुपिन्सं यानादीसा मतयाःया लिपांगु ब्वय् थुगु क्षेत्रया त्वाःम्वः (टोलया नाइके) पाखें निस्ला (पिण्डपात्रय् जाकि, धेबा) व निस्लापाः (बजि, पालु, मरी) छायेगु याइ । मतयाःया दथुइलाक्क महाद्यः च्वनेगु चलन दुसा महाद्यः वःगु खनेवं मतयाः बच्छि क्वचाःगु संकेतकथं थुइकेगु चलन दु ।

नेपाल सम्वतकथं झिगूगु ला गुंलाज्वःछि थीथी बौद्ध धार्मिक परम्परा न्ह्यानाच्वनी । थुगु हे चलन दथुइ थ्यंमथ्यं ८५० दँ न्ह्यः लिच्छिवी जुजु बालार्चन देवं जेष्ठवर्ण महाविहार तंगबहाः नीस्वंगु लसताय् थुगु मतयाः न्ह्याकूगु धापू दु ।

कोन्तिइ नवबाजा न्ह्यब्वयाः न्ह्याइगु थुगु मतयाः बौद्ध संस्कृति खःसां थुकी शिव व शिवगणया ब्वति नं दये हे माःगु चलन दु ।

छेँजःपिं मदुगु दुःखय् मदुपिन्त लुमंकाः सुखावती भूवनसं बासं लाइगु कामना लिसें न्ह्याइगु मतयाः पर्वय् सकसिनं श्रद्धाकथं ब्वति कायेफइ । भगवान बुद्धया ध्यान भङ्ग यायेतः वःगु स्कन्धमार, मृत्युमार, देवपुत्रमार, क्लेशमार, अभिसंस्कारमारयात त्याकाः बुद्धत्व प्राप्त यायेधुंकाःलि थुपिं मार भगवान बुद्धया हे शरणय् वंगु दिं सापारुया हे कन्हेखुन्हु शरणकथं वनीगु थुगु यात्राय् ख्यालः पुचः व त्वाः त्वालं बाजं खलःया नं ब्वति दइ ।

वाद्यवादन थुगु परम्पराया मेगु विशेषता खः । बाजं व वादनया ज्वःमदुगु परम्परा नवबाजा (धिमे, नाय्खिं, क्वँचाखिं, मगःखिं, नगरा, ढोलक, मृदङ्ग, झाँक्री बाजा, जोरानगरा, दह ब्याबाजा, खँजरी, दबदब, धाः, दमोखिं, नेकू, तिक्ली तथा पय्ताखिं) थायेगु थुगु पर्वय् धाः, न्यकू, दमोखिं, मूबाजंकथं थाइसा नेकू बाजंया हे नामं थुगु जात्रायात न्यकू जात्रा धायेगु यानावयाच्वंगु खः ।

४०० दँति न्ह्यः मल्ल जुजु सिद्धिनरसिँह मल्लं देसय् लूगु माहामारी व हाहाकार न्हंकेतः राजगुृरु बज्राचार्य गुरुजुपिंनाप सल्लाह यानाः १० गू त्वाःयात पालंपा न्यकू जात्रा न्ह्याकेगु भाला बीगु चलन न्ह्याकाः ब्यवस्थित यायेगु ज्या याःगु खः ।

न्यकू जात्राया झ्वलय् नवबाजा न्ह्यब्वनेगु व बोगी क्वचाये धुंकूगु दुसा भाद्र २ सनिलया ६ बजे कोन्तिइ नवबाजा थायेगु, भाद्र ५ गते नकबहिली मुनाः सुथसिया ४ ताः इलय् मतयाः न्ह्याइगु, थुगु हे दिनय् सुथसिया ११ बजे नकबहिलिं हे पूधाः पिथनेगु, न्हिनसिया १ बजे यल लाय्कुलिइ नवबाजा थायेगु, भाद्र ६ गते सुथसिया ११ बजे नकबहिली मुनाः बुंगमती वनाः नवबाजा थायेगु, भाद्र ७ गते सुथसिया ११ बजे नकबहिली हे मुनाः स्वयम्भूइ नवबाजा थायेगु, थुगु हे दिनय् सनिलय् ५ बजे गणेशपूजा ब्वना व सुचं बीत नाय्खिं च्वयेकेगु, भाद्र ८ गते शनिवार न्हिनसिया १२ बजे नकबहिली मुनाः गणेशपूजा वनेगु, भाद्र ८ गते हे सनिलया ७ बजे सिरपा हना देछायेगु व क्षेत्र नं २ मंगःयात पाःब्व लःल्हायेगु ज्याझ्वः दुगु पत्रकार सम्मेलनय् जानकारी ब्यूगु खः ।