‘गुणलक्ष्मी स्मृति रोटरी स्वास्थ्य सम्मान’पाखें वरिष्ठ नुगःल्वय् विशेषज्ञ प्रा.डा. राजेन्द्रप्रसाद कोजुयात हंगु दु । काठमाडौं विश्व विद्यालय स्कूल अफ मेडिकल साइन्सेजया पूर्व डीन वय्कः थाैंकन्हय् धुलिखेल अस्पतालय् ज्या यानाच्वनादीगु दु ।
रोटरी क्लब अफ पनौतीया गुक्वःगु पदस्थापना समारोहया लसताय् प्रा.डा. कोजूयात हंगु खः ।
रोटरी क्लब अफ पनौतीया संस्थापक नायःलिसें वरिष्ठ मिसा व प्रसूति ल्वय् विशेषज्ञ प्रा.डा. सुमनराज ताम्राकारं दिवंगत मां गुणलक्ष्मी ताम्राकारया लुमन्तिइ रोटरी क्लब अफ पनौतीं दँय्दसं स्वास्थ्य विशेषज्ञयात लःल्हायेगु यानाः उगु हना स्वनादीगु खः । थुगु हना थुगुसी न्हापांखुसी प्रा.डा. काेजुयात लःल्हाःगु खः ।
पनौतीया डायमण्ड हिल रिसोर्टय् जूगु ज्याझ्वलय् मूपाहाँ रोटरी इन्टरनेशनल डिष्ट्रिक्ट ३२९२ नेपाल-भुटानया पूर्व गभर्नर सिए जितेन्द्रबहादुर राजभण्डारीं वय्कःयात दांतकालिसें हनापाै लःल्हानादीगु खः ।
थुकथं हे प्रा.डा. ताम्राकारं थः अबुया लुमन्तिइ स्वनादीगु ‘पुष्पराज स्मृति रोटरी पत्रकारिता सम्मान’ काभ्रेपलाञ्चोक जिल्लां २८ दँ न्ह्यःनिसें पिदनाच्वंगु काभ्रे टाईम्स साप्ताहिकयात लःल्हाःगु दु । साप्ताहिकया कार्यकारी सम्पादक रमेशप्रसाद न्यौपानेयात मूपाहाँ राजभण्डारीं ध्यबालिसें हना लःल्हाःगु खः ।